Amaynut di tira: isuffeɣ-d uselmad Musa Imarazen adlis nniḍen

Ass n 7 meɣres yezrin i d-isuffeɣ uselmad Musa Imarazen adlis nniḍen d amaynu s uzwel n « Imennan n tyemmat », ɣer teẓrigin Imal. Ɣef wawal n umeskar, taḥawact i d-yuwi deg tsuffeɣt-a yebɣa-tt d tajmilt i yemma-s tamerḥumt d tyemmatin merra.

« (…) Adlis-agi , Imennan n tyemmat, d tajmilt i yemma i aɣ-yeǧǧan ass n 30 novembre 2020. D kra seg wayen i yi-d-tenna d wayen i d-gemreɣ ɣer tlawin nniḍen, ama d isefra ama d izlan », i aɣ-d-yenna  mass Musa Imarazen mi t-nesteqsa.

Ad d-nesmekti dakken mass Musa Imarazen d ameskar n ddeqs n yidlisen s teqbaylit d tefransist, seg-sen nezmer ad d-nebder « Manuel de syntaxe berbère, 2007 », « Timɛayin n Leqbayel, 2007 », « Eléments de morpho-sayntaxe kabyle, 2014 », « Etude syntaxique du substantif, 2015 », « Awfus n theṛṛumt n teqbaylit (Taseddast), 2016 », « Rhétorique et figure en kabyle, 2016 », akked « Timɛayin-nni, 2016 ».

Ma ɣef umecwar amatu n uselmad-a deg Ugezdu n tesnilest n tesdawit Mulud At Mεemmer n Tizi Uzzu, yuwi-d agerdas n Duktura deg tesnilest tamaziɣt, aseggas n 1997. Yella dinna, yiwen n wakud akken, d aɣella n Ugezdu n tutlayt d yidles imaziɣen.

Tzemrem ad tafem adlis-a n « tmussni n wat zik » deg waṭas n tnedlisin ussan-a.