Ayt Smaɛel: Acimi iεeṭṭel usebdad n Lmulud At Mεemmer?

Tella thegga tɣiwant n Ayt Smaεel, deg usamar n Bgayet, ad tesbedd yiwen n usebdad (statue) n usmekti n umussnaw Lmulud At Mεemmer, ilmend n Yennayer yezrin 2971. Maca ur temmug ɣer taggara tfuggla n usbedd.

Nesteqsa yiwen seg yimḍebbren n tɣiwant n Ayt Smaεel ɣef tsebba n waya, yenna-aɣ-d: « Tuɣ nenwa ad nesbedd asebdad-a ilmend n yennayer yezrin. Maca yella-d cwiṭ n uεeṭṭel seg tama n unaẓur i t-igan. Meḥsub llan kra n yireqqiεen ilaq ad ten-yexdem. Ma d tura, mazal kan ad nefru taluft n uxelles ».

Ma ɣef wamek i d-tella tekti-a, yerna-d win i aɣ-d-yettmeslayen: « Imi ɣur-neɣ aṭas i nefka amḍiq i Dda Lmulud At Mεemmer, nenna-as d lawan ad as-nheyyi daɣen asebdad tama uxxam n yilemẓiyen i yuwin isem-is. Ma d axelles n usebdad-a, yezmer ad yili sɣur Useqqamu aɣerfan n ugezdu n Bgayet ».

Akken i d-iban lḥal, d taluft n wakud ihi. Gar-aɣ d kra n wussan ad temmag tfuggla n usbedd n usebdad-a, d tajmilt i Dda Lmulud At Mεemmer.