Zedek Mouloud di Paris: « JSK am tyemmat, ur nezmir ad nesmeḥ deg-s »

Akka i d Iqbayliyen! Ɣas ma yella tikwal mgaraden deg tektiwin, lameεna deg teswiεt n ṭṭiq, ttbeddaden s yidis n win yesran i ufus n tallelt.

Tikkelt-agi dɣa, d azamul seg yizumal n tmagit-nneɣ i teεna temsalt. Tagi d tarbeεt n yilemẓiyen n Yiqbayliyen, i yettidiren taswiεt iweεren ussan-a.

Ilmend n waya, yella-d ass-a di Lpari,deg umḍiq umu qqaren Amraḥ n tigduda, tamurt n Fransa, unejmuε n Leqbayel iḥemmlen Jsk. Anda i d-meslayen imeεcuqen-is ɣef ibeddi-nsen s yid-is. Deg-sen anaẓur ameqqran Lmulud Zeddak.

Dda lmulud yebda-d awal-is s usefru, anda i d-yenna:« Ayen ara d-iniɣ ass-a, nniɣ-t-id yakan; D kemm i d taqbaylit, D tasedda n tefriqt I Yimaziɣen d asirem. D kemm i d tigejdit Iɣef tbedd tnaslit, d axxam i ibedden yes-m. Ayen i d-tebdiḍ kemmel-it, d amnay n talwit I wigad i aɣ-ikerhen. Amennuɣ-nneɣ awi-t, ɣer yiswi siweḍ-it, yes-m kan i aɣ-εeqlen ». Syin akkin, iwekked-d belli ur ilaq ad neǧǧ tarbeεt-nneɣ i yiman-is.

Imi JSK ur telli d tarbaεt n waddal kan, meεna d tayemmat n Leqbayel, d azamul n tmagit. D sseqf i aɣ-yesdukkulen, ara aɣ-yesdukklen sya ɣer sdat. Ikemmel deg wawal-is yenna-d:« ur ilaq ad tt-neǧǧ gar yir ifassen, imi bɣan ad as-bedlen isem yeεdawen n teqbaylit. Rnu i waya, ma truḥ JSK, iruḥ usirem ».

Di taggara, yekfa awal-is s usefru-nniḍen yenna-d : « win yugin taqbaylit, awer timlilit » . Neɣ s unamek-nniḍen, win ur nebɣi abaɣur n JSK, ur yelli d Aqbayli n tidet. Ihi ur d-as-nesra.