(single). Amaynut di ccna: Tizlit yeddan d tallit n Iflis

Yessuffeɣ-d ucennay Iflis, iḍelli kan, 5 yebrir 2021, yiwet n tezlit (single) d tamaynut s uzwel n “Tadukkl” idegj i d-yuwi kra n tektiwin ɣef tallit-a tamirant.

Nezmer ad d-nini d awennet i d-iwennet unaẓur addad (liḥala) n Tmurt Taqbaylit d Yiqbayliyen yid-s. Si tama nniḍen, akken i d-yeqqar uzwel, d asiwel ɣer tdukkli, d ancad i yenced ucennay-a gma-s Aqbayli i wayen ara as-yelhun i netta d Tmurt-is deg umha d yimal.

Ɣas ad d-nini tekcem tezlit-a deg usenf n tezlatin yessawkayen imi, s umedya, ma neddem-d kra n wawalen deg-s, yeqqar ucennay : « tifrat ɣur-neɣ i tella, ur nettlummu deg yiɛdawen. Ma ndukklet ay aytma, ur aɣ-yettizmir yiwen ».

 Ad d-nesmekti dakken yecna Iflis tizlit-a s tikkin n Murad Bakir d Tiliwa. Si tama n wallalen n uẓawan, ad naf abeεda Yuba Sid s tgiṭart, d Rabeḥ Xelfa s tderbukt.

Tzemrem ad as-teslem i umaynut-a aẓawanan deg wassaɣ-a i d-nga da.