Ferεun: Ahil igerrzen n tdukkla Lbacir Amellaḥ i warrac

Tettheggi-d tdukkla tadelsant n tmaziɣt Lbacir Amellaḥ i wussan-agi n taggara n ddurt ahil yelhan i yinelmaden n uɣerbaz-nsen.

Dɣa, deg wayen i d-xedmen deg ulɣu-nsen, ad yebdu ass n lǧemεa 9 yebrir mara yili uεayer n yinelmaden ɣef waṭṭanen n tmesliwt akked wigad n tepsikulujit. Inelmaden teεna temsalt d wid n uɣerbaz amenzu n taddart n Icekkaben, deg tɣiwant n Ferεun.
I yisalli, ad yebdu ccɣel-agi seg 09:00 d tasawent.

Daɣen, ad d-nesmekti d akken ad ikemmel leqdic i wass wis sin n ssebt 10 yebrir s uheggi n yiwen n usarag s uzwel-agi: Uguren n umeslay deg timawit d tira. Asarag-agi ad d-yeḍru ɣef 15:00 n tmeddit deg uxxam n tdukkla-agi Lbacir Amellaḥ.

Yal yiwen i izemren ad iruḥ, atan yettwaεreḍ ihi i tigawt-agi yesεan azal. Nekkni si tama-nneɣ nessaram-asen afud igerrzen.