(Tavidyut). Aklip n Zayen: tajmilt n wul i ucennay ameɣradan Idir

Seld kra n uraǧu, yessuffeɣ-d Zayen, ussan-a kan, aklip n tejmilt i ibudd i ucennay Aqbayli Idir, i aɣ-yeǧǧan ass n 2 mayu 2020.

Deg-s yesmekta-d Zayen s umata kra seg wayen i d-yuwi Yidir deg umennuɣ-is i talwit, i tmagit, i tlelli d talsa. Ama s tezlatin-is i yettwassnen deg waṭas n tɣemmar n umaḍal, ama s tikli-s d waddud-is berra i tezlit.

Yeqqar ucennay Zayen di tsetna (refrain): « Ay Idir ay Idir, ssut-ik ad yidir. Ad yidir ad yidir, i lebda ay Idir ». Tizlit-a d Zayen i as-ixedmen aẓawan, ma d asefru yura-t Muḥemmed Ɛawdiya.

Ad d-nesmekti belli yella iberreḥ-d yakan Zayen s uḍris affeɣmenzu (inédit) n tezlit-a ilindi deg 2020, kra n wussan kan seld tamettant n Yidir. Dɣa tura, yeqqim-as iga-tt d aklip s tugniwin i yettruḥun seg wudem n Yidir, ɣer ugama, tazeqqa n ccna akked ustudyu.

Tzemrem tura ad twalim aklip-a deg wassaɣ i d-nga da.