Seld lɣiba iḍulen: ḥeḍru-d ad d-yeffeɣ walbum amaynut n Uleḥlu

Gar ccbaḥa n ugama, d ccbaḥa n tyuẓaḍ i yettfaraṣen tagella seg ufus-is s tumert. Iban-aɣ-d wudem n yiwen unaẓur i nḥemmel ayendin. Ahat tuget deg-wen ẓran d aniwa-t, imi yettwassen Uleḥlu s leḥmala-s i ugama d yiɣerṣiwen.

D yiwet n tvidyut ihi i d-yexdem unaẓur Uleḥlu di Youtube, anda i d-iberreḥ i wid i t-ḥemmlen ttabaεen-t ɣef umaynut-is. Deg-s dɣa, yemmeslay-d belli ur tettεeṭṭil ara tuffɣa n walbum-is amaynut, imi yessuli asekles-ines.

Γef leḥsab n lehdur-is, album-a deg-s ugar n 18 n tezlatin. Rnu i waya, akken i nuɣ tanummi yakan, Uleḥlu iwekked-d belli d tizlatin s wazal-nsent. Ama deg wayen yeεnan asentel, aẓawan, asefru, izen i bɣant ad d-sleḥqent, neɣ d lemεani-nsent.

Am akken i d-iberreḥ daɣen, ɣef tildin n targa-ines di YouTube, anda ara d-ilint daɣen tezlatin-a. Ihi i wid iḥemmlen Uleḥlu, nnezdit ɣer targa-s OULAHLOU Officielle.