Ass amenzu n Remṭan: amur ameqqran n lbuṣtat bellεent

Rnu i ssuma n yigumma d tidal i iεeddan akken i tlisa, yuɣal umdan di tmurt n Lezzayer, yettbeddad ugar n sin n yisragen, i wakken ad d-yaɣ tackart n uyefki.

Di lawan anda i ttεassan Yizzayeriyen ad tbeddel fell-asen teswiεt, d anemgal, simmal tettiqsiḥ fell-asen. Armi uɣalen yemdanen ur sseḥsaben i kra, ttxemmimen kan ɣef yiεebbuḍen-nsen.

Seg tama-nniḍen, tuget n yixeddamen deg tiɣula( domaines ) yemgaraden, ssuturen izerfan-nsen.

Ihi, seld iselmaden i igan asunded ussan yezrin, teggeḍ-d nnuba n yixeddamen n lbuṣta, i yebdan aggur n remṭan s usunded.

I yisalli, yerkeb zzεaf iɣermanen merra, ayagi imi ttwalin belli mačči d taswiεt n usended, ladɣa deg ussan-a, imi sran medden i tedrimt.

Ma d ixeddamen n lbuṣta seg tama-nsen, ttwalin belli d tagnit i wakken ad d-muqqlen wid teεna temsalt i waddad-nsen, ad asen-d-rren i wayen i ssuturen.

Γef leḥsab n yixeddamen-a, ssuturen ad asen-rnun di ssuma, imi ttwaḥeqren nezzeh. Am akken i bɣan ad yenqes fell-asen leḥriṣ n uxeddim.

Ad d-nesmekti belli asunded-a yella di twilayin n tmurt akk, gar-asent tid n tmurt Taqbaylit.