(Tavidyut). Tuɣalin n Uleḥlu: yeldi abrid s tiɣri “Ay abaraǧ”

Segmi i d-iberreḥ ihi s tuɣalin-is ucennay amḥaddi Uleḥlu, ur iɛeṭṭel akken ad d-yefk tarzeft tamezwarut n ccna i wid i t-iḥemmlen mi d-yesres, iḍelli 13 yebrir, di Youtube tizlit tamaynut i izewwel “Ay abaraǧ”.

Di tmedyezt, nezmer ad d-nini d aɣanib(style) i nwala ɣur-s deg wayen iɛeddan, i d-yuwi deg umaynu-a. Ɣas iban-d lexsas n wallalen di tɣara n tvidyut, neɣ n uklip, maca iɣumm-ik akk yizen n tezlit-nni d uẓawan i nessen deg uɣanib n Uleḥlu.

Deg tezlit-a dɣa, yerra-d ddhen Uleḥlu ɣer Tmurt Tazwawt (Taqbaylit) d waddad i tettidir iseggasen-a ineggura mi yendeh s yisem n ubaraǧ i as-d-xeddmen wid-nni deg ubrid. Yebder-d taluft n wakal, tin n yidles, n tsertit, n yiǧadarmiyen d wayen nniḍen. Yerna daɣen yefka-d kra n yiwellihen s tegzi i wid i t-ifehhmen.

Yeqqar ladɣa di di tsetna(refrain) n tezlit-a:

Ay abaraǧ, ur tufiḍ d acu i d-nuwi

Ay abaraǧ, d Tafsut i nettheyyi

Ay abaraj, d Tamurt n baba d jeddi

Ay abaraǧ, lbaṭṭel yugi-t Rebbi

Ad d-nesmekti dakken mazal ad d-yernu tizlatin nniḍen ussan-a i d-itteddun.

Walit tavidyut n tezlit-a tajdidt da neɣ deg terga-s tunsibt n Youtube OULAHLOU officielle imi yelha ma tennezdim (s’abonner) deg-s.