(Teaser). Aberreḥ n Zedek Mouloud s tezlit-is ɣef Tefsut Taberkant

Akken yella yetturaǧu, isuffeɣ-d unaẓur Lmulud At Smaɛel (Zeddak) aberreḥ n uklip-is i d-iheyya d tajmilt i ymeɣrasen n Tefsut Taberkant.

Dɣa, nnig n tejmilt i wid akk yennuɣen s yifassen d ilmawen, ɣlin mi sutren izerfan n tudert d tmagit, yenwa-tt Zeddak Mulud tezlit-a d asmekti-nni ara d-yesmektin ilemẓiyen n wass-a ladɣa, ɣef wazal n tigawt i gan warrac di 2001 akked umḍiq n uneḍruy-a(événement) deg umezruy.

Seg wawalen dɣa n tezlit-a tamaynut, yeqqar: « tizlit-agi d asmekti, win yettun ad t-id-nfekker ». Taɣara d usinaryu n uklip, ɣef wakken nwala tugniwin timezwura kan, yezmer ad ilin lhan, war ma nebder-d asefru.

Ula d iticerten (t-shirt) i d-yefkan tanfalit-nsen ula d nutni, llan muggen-d beddemma i uklip-a. Amedya, wa i nettwali di tewlaft ideg yura: ulac ssmaḥ ulac.

Ad d-yawi war ahat amur-is n wayen yelhan uklip-a, tugart imi drus i icennun taggara-a ɣef Tefsut Taberkant, neɣ i tt-id-yesmektayen di tezlatin.

Ttiεad ihi i tuffɣa tunsibt n umaynut-a ara d-yilin ass n 17 yebrir 2021 ɣef 17:00 di terga tunsibt n ucennay ɣer tansa-a n Youtube.

Sey-a ar imir-n, walit da aberreḥ n tezlit-a, neɣ deg usebter-is n Facebook.