(aḥric aneggaru). Taɣuri n “Tissirt n nndama” n Meɛtub Lwennas : Tamsirt n tudert
Deg ukuẓ n yiḍrisen n tezlit yessa-d sdat-neɣ s waṭas acettki ɣef liḥala-s akked uwessef n umdan s umata, ma deg uneggaru-a ala awessi lqayen i ara naf deg-s.
Wessaɣ-k ay uḍrif
Ttmeyyiz, rẓen tikli
Mi ad tqerrbeḍ asif
Zger anda ur k-yettawi
Taḍsa n wuglan tettɣurru
Tessawal i deεwessu
Ad k-yefk yinijel i yifri
Γef tεebbuḍt bnadem i ileḥḥu
Am uzrem i yettsuḍu
Yezmer-as siwa Rebbi
Seg zik qqaren “ameyyez qbel aneggez”, yettɛewwad-d unaẓur awal ɣef waya, tikli i ddunit ed uxemmem i yal asurif ara tegreḍ. Rnu-as daɣen tillin-nni d nniya ur nemɛin anda ma yezmummeg-ak-d umdan dayen ad as-tefkeḍ ul-ik ed lbaḍna-k, netta akken i d-yewwi deg wawal-is, seg yinijel i iteqqsen, i iweɛren annect-n tzemmreḍ ad tḍilleḍ srid deg yifri, ma d bu sin n yiḍarren (amdan) icebbeh-it ɣer uzrem amihan (dangereux), i yettsuḍun, i ileḥḥun ɣef uɛebbuḍ, dakken ala Rebbi i as-izemmren.
Win ad k-yesqerḥen
S tidet ur nesεi ara ddwa
D netta ad izeglen
Tifxet ur k-tettḥaz ara
D bnadem ad k-id-isferḥen
D netta ara k-inefḍen
Ma yella ur tebniḍ ara
S kra n umdan yettamnen
Ayen yakk zerεen medden
Ssqef-is yezga yeεra
Dayi ira ad d-yini sɛu, tesqedceḍ taflest (liman), ɣas ad k-yeg yiwen ndir eǧǧ-it i teɣdemt tarebbant (justice divine), wamma seg tama tayeḍ izemmer d win i k-d-yesferḥen da i ara k-iqerḥen dihin skud yella laman i iteddan deg waman.
Win i k-id-yesteqsan
Liḥala-k amek tella
S teḍsa n wuglan
Zmumeg-as ad yesteqneε
Ini-as “aql-iyi labas ”
Γef yiḍ yezga yuli wass
Seεreq-as ayen yebɣa
Hder-as ɣef lǧebba d lkas
D wanda akk wwḍen leǧnas
Ul-ik ur as-t-ssenɛet ara
Amdan ur nesɛi tigezzi (lbaḍna) xersum tayla-s, tin i yiman-is, am tfekka taḥeẓṭiṭ (taɛeryant) war aselsu d sser. ɣef waya yettini-d unaẓur ur ilaq ad teqqareḍ dima ayen yellan i umdan ladɣa ɣef wayen i k-yerzan, acku ahat ayen iɣef i k-d-yesteqsa d kra nniḍen i yenwa seg-s.
Ur ttamen ara
Ad ak-yini “kker ad tt-id-nesker”
Ad k-yeḥwiǧ ass-a
Azekka, ad k-ideqqer
A win i k-yennan “ma teḥsiḍ
Anwa lasel deg i d-temɣiḍ ?”
Ini-as “d mmi-s n Lezzayer”
Tewεer twaqqsa n usemmiḍ
Yewεer mi ad k-id-yerr lḥiḍ
Yewεer ubrid n liser
Seg laman i d-yekka lxuf, taluft-a tecɣeb nezzeh ameskar, yettwessi ɣef laman n win ara k-iẓẓuɣren kan i ubaɣur-is (lfayda) taggara ad k-yebru deg ugelmim n tlefsiwin, da ahat d ayen ijerreb s timmad-is. Ma d tiririt i usteqsi “d acu i d lasel-ik”, da ahaqel yella mazal yettamen s Lezzayer tazzayrit.
Zemren ad ruḥen
Ad k-d-smunzun* tiqsiḍin
Ad tekkiḍ yid-sen
Allaɣ-ik ad ak-t-rwin
Ma yella kra ur teẓwireḍ
I temsal ur tḥebbreḍ
Tawaɣit ad k-terr d aεwin
Wamma ma yella tfehmeḍ
Uqbel aẓdam tettmeyyizeḍ
S lesrar ara tqableḍ lesnin
Amedya i d-yefka da yettaẓ ɣer winna n tsertit, ɣef ugraw-nni n wid ur nesɛi imenzayen (principes) mara ttḥebbiren kan argaz yesfan, ad t-aɣen bac ad t-ssimsen, d ayen iɣef yettnebbih umeskar, ma d tikli nniḍen iɣer d-yuɣal, ad nefhem dakken axir yiwen ma yella d ukyis, yedder tudert-is d ushil gar wiyaḍ wala ajṭiṭṭeḥ ur d-nettawi.
Xḍu-k i ttnefxa
Eǧǧ-asen i medden ad k-cekkren
Ur sfuǧǧuɣ ara
D yir awal ad k-inefḍen
Gar-asen abrid nǧer-it
Ma d iles ẓiden, ttak-it
Ttεici tamεict-nsen
Win teẓriḍ yefhem, ssimen-it
Sserr-is, qelleb issin-it
Kbel*-as deg wafriwen
Amdan yerran zzux d taɣawsa-is yeɣlayen, dima d amessas deg kullec, ma yerna asfuǧǧeɣ deg umeslay din ad yerẓig. Eǧǧ-asen i medden ad k-cekkren ma yella kra i tuklaleḍ, tḥekmeḍ iles-ik mara yettkernunnuḍ ad d-yeffeɣ, tiliḍ d umɛin akked win yesseqdacen tigzi daɣen, daya i d-yessefham unaẓur.
Lhi d ccɣel-ik
Muqel abrid yessufuɣen
Ṭṭinez* ɣef warraw-ik
Ma ur yelli deg wacu i xussen
Ur snefsusu lǧib-ik
Ldi kan ciṭ afus-ik
Γas ferreq deg yimdanen
Win ad d-yaẓen ɣer nnif-ik
Dinna ɣas εemmer lfuci-k
D aḥlalas* ad tt-ileεben
Ulac d acu i igerrzen am mara ad d-yelhu yal amdan ed tudert-is war timḍerrit i wayeḍ neɣ d ahḍar ur nwata fell-as, tili ur nɣerreq deg wannu (lbir) n ccwal dɣa. Yeqqar-d daɣen Lwennas n Ayt Lewnis ur ttili d imwedder ur ttili d amɣallu (égoïste), ladɣa seg tama n uxdam n lxir i win yesran (yuḥwaǧen). Rnu daɣen tamsalt n nnif – ɣef wacu yemmut dɣa – seg wakken ur iqebbel ad iḥaz yiwen nnif-is neɣ n wayeḍ, iruḥ almi i d-yessken amedya i izaden cwiṭ ma negra tiɣri i lmeɛqul, acku ala urrif i izemmren ad k-yeǧǧ ad tgeḍ anɣa (crime). Aredmani deg uḍris n tezlit s umata tban-d tissirt n nndama n umedyaz, i d-yurwen tamsirt n tudert, d ayen i d-iberreḥ unaẓur s taɣect-is i win yettḥessisen, nekni neɛreḍ ad as-neg i uḍris asegzi d uzɣan aseklan (critique littéraire).
Mhenni Xalifi, Aɣmis n Yimaziɣen 2014
Walit da Aḥric 1: (aḥric 1). Taɣuri n “Tissirt n nndama” n Meɛtub Lwennas : Tamsirt n tudert
Walit da aḥric 2: (aḥric 2). Taɣuri n “Tissirt n nndama” n Meɛtub Lwennas : Tamsirt n tudert
Walit da aḥric 3: (aḥric 3). Taɣuri n “Tissirt n nndama” n Meɛtub Lwennas : Tamsirt n tudert
Walit da aḥric 4: (aḥric 4). Taɣuri n “Tissirt n nndama” n Meɛtub Lwennas : Tamsirt n tudert