Asmekti n Tefsut Taberkant d tin n 80: Ddeqs n tikliwin ara yilin

Ilmend n usmekti n Tefsut n 80, tin n 81 akked Tefsut Taberkant, ad d-ttwaheyyint ma drus kraḍ n tikliwin di Bgayet, Tizi Uzzu d Tubiret. Am wakken daɣ ara mmaggen yimyegrawen(inejmuɛen), ladɣa di lberrani, i wussan-a n sdat-neɣ. Ar tura, ayen akk ara d-yilin, ala Amussu n Ufraniman i Tmurt n Yiqbayliyen (MAK) i d-ibanen d imheyyi.

Deg wahil ihi n aram-a 20 yebrir 2021, ad tili tikli deg Tubiret, seg Yiwaquren alama d Imceddalen mettwal 11:00. Tayeḍ, ad d-tettwasuddes ɣef 11:00 daɣen di Bgayet. Ad tebdu seg tesdawit n Terga Uzemmur ɣer Umraḥ Sεid Meqbel. Deg yiwen n wakud ula d tinna n Tizi Uzzu, ara isidden seg tesdawit n Ḥesnawa alama d taɣiwant (lamari) taqburt.

Ad d-nesmekti dakken yetturaǧu ad ilin yinejmuεen ula berra Tmurt, ɣas ulama yettwagdel ass-a, 17 yebrir, win i niqal ad yili di Ottawa. Tamentilt (ssebba) n waya tcudd ɣer waṭṭan n Covid-19. Ma yella di Fransa, ad yili unejmuε azekka 18 yebrir ɣef 13:00, deg Umraḥ n Tigduda.

Isiharen n usmekti kecmen deg umennuɣ mgal tatut, maca daɣen d tajmilt i wid akk inuḍḥen seg zik, i wid yeɣlin s ufus n udabu imi sutren ad tbeddel liḥala-nsen, ad idiren idles-nsen, taqbaylit d temmuzɣa-nsen. Yal Aqbayli teεna-t taluft akken yebɣu yili umili-is asertan