(TIWLAFIN) Seld ixeṣṣaren n zznezla: teɣreq temdint n Bgayet deg yiḥemmalen n waman

Kkren-d yimezdaɣ n temdint n Bgayet tanezzayt n wass n sem ɣef yiwet n tugna ur bnin fell-as. D iḥemmalen n waman i yeččuren iberdan, rran-ten d idigan n uεummu.

Ama deg Uεemriw, Sid Ɛli Lebḥer, Tala Merxa, Sidi Ḥmed, neɣ ddeqs n temnaḍin-nniḍen, d yiwen usaru i d-uraren iḥemmalen n waman deg-sent.

Rnu i liḥala n yiberdan i yellan yakan di yir liḥala, kemmlen waman n yiḥemmalen-a ssxeṣren-ten ugar. I yisalli, tamentilt n iḥemmalen-a, d lfusiyat ibellεen s ugudi, akked waman i yettnejmaεen ulac anda ara ffɣen.

Ad d-nesmekti belli, mačči ala di temdint n Bgayet i d-glan waman s lemḍerra. Lameεna llan yiberdan-nniḍen ttwabellεen imi i d-grarben deg-sen yiblaḍen. Am ubrid n Buxlifa, d win yellan gar Tizi n Berber d Kefrida.

Di taggara, tlaq lemḥadra imi mazal-it ageffur di ttiεad.