(Tavidyut). Amaynut n Lounis Ait Menguellet: gar tekmamt n waṭṭan d tekmamt n tsusmi
D tizlit i yeččuren d lemεani tin i d-yessuffeɣ iḍelli Lewnis Ait Mengellat deg yiẓedwan inmettiyen.
Deg-s dɣa, yemmeslay-d ɣef waddad n tudert n umaḍal s umata segmi i d-yennulfa waṭṭan n Covid 19, imi tbeddel liḥala n tudert gar yiḍ d wass. Ayagi seg yiwet n tama.
Ma yella seg tama-nniḍen, yewwi-d s tegzi ɣef wagdud Aqbayli, d umaziɣ s umata i yettuḥettmen ad yessusem seg 62 ar ass-a. Neɣ s unamek-nniḍen, yezga yeεdel takmamt war lebɣi.
Tizlit-agi nezmer ad tt-nebḍu ɣef yiḥricen.
Aḥric amezwaru, yerra deg-s unaẓur tajmilt i usefru. Ayagi imi, d netta i yezgan d amdakkel-is, i as-iteddun di lebɣi, s yes-s dɣa i d-yeṣṣawaḍ tiktiwin-is, ihi yenna-as:
Anda i ddiɣ yid-i yedda
Asefru sεiɣ-t d amrafeq
Ama di lferḥ, ama di tmara
Yis-s i yettiẓid lmenṭeq
Sεiɣ-t d arfiq n dima
Leεmer i yi-iǧǧa weḥdi
S idis-iw yezga dima
Deg yiṭṭij neɣ di tili
Yal ma rriɣ ɣur-s yella
Yettara-d i lbaṭṭel lḥeq
Yessen amek ad d-yesres lehna
Yeẓra melmi ad d-yeṭṭerḍeq
Ass-agi ḍelbeɣ i usefru
Nniɣ-as acu ara d-iniḍ
Yenna-d eml-iyi-d ɣef wacu
I wakken ad ak-d-afeɣ lxiḍ
Γur-i ayen tebɣiḍ yella
Ayen tuḥwajeḍ ad tafeḍ
Xṭir ma iεjeb-ak kra
Ma ur k-yeεjib ad t-sefḍeɣ
Ma yella deg uḥric wis sin, yemmeslay-d ɣef teswiεt iweεren ideg i d-nεedda, ɣef sseba n waṭṭan iḥuzan amaḍal.
Aneggaru-a ibeddel tikli n waman, iṣṣexreb aṣaduf n tudert i umaḍal.
Yeṣṣaweḍ armi iga tilisa gar wid yemḥemmalen, ula d aswir n medden yuɣal yemtawa, uɣalan akk kifkif, Γef waya yenna-d:
Acḥal n wuguren yellan
Yes-sen teččur ddunit
Ayen iεemren ayen ixlan
A win i tebɣiḍ awi-t
Ad zwireɣ ad ak-id-cekreɣ
Imi i d-iyi-tettaɣeḍ awal
Ass-agi bɣiɣ ad ak-ciwreɣ
Γef lehlak i d-yeglan s ccwal
Yusa-d yessewhem lɣaci
Ulac win yebnan fell-as
Ur nezmir ad t-nwali
Akken ad as-negg aεessas
Di lehlakat i nessen
Yal ṣṣenf ur d-aɣ-yezgil
Ma d wagi i d-aɣ-iqeṣḍen
Ad t-iḥekku lǧil i lǧil
Yennulfa-d lehlak-agi
I yessemsawan ddunit
A win yesεan a win ur nesεi
S tekmamt udem iɣumm-it
Nuɣal Akk nettemcabi
D tajlibt i inehher umeksa
ad d-nettmektay iḍelli
Amzun yebεed ɣef ass-a
Dɣa ma nerna i wallen nnwaḍer tiberkanin
Ad yuɣal win i nessen ur t-nεeqqel ur d-aɣ yessin
Ma yella deg uḥric aneggaru yeḥka-d tamacahut n wegdud Aqbayli, Amaziɣ i yettwaḥeqren di tmurt-is. Tettwagdel fell-as tlelli n umeslay, d tin n tudert i as-iwulmen.
Imi yezga d amennuɣ ɣef tmagit-is seg 62 ariḍa ur tefri fell-as. Rnu, ur tufiḍ d acu i d-yexdem seg imir-n ala tasusmi. Amdan-agi yettmuqul deg laṣel-is ifessi cwit cwit, yettraǧu-t melmi ad yekfu war awal.
Yettεassa ad tbeddel fell-as teswiεt, meεna simmal tettiqsiḥ ugar.
D ayen i d-yessegza deg tṣeddarin tineggur-a n tezlit-a anda i d-yenna:
Takmamt seg 62 tuɣal-aɣ d tannumi
Neqqen-itt ttεeddin lesnin
Wa yettnekkar wa iɣelli
Neṭṭmeε nnfeε deg ilem
Nettraǧu ad d-yecreq fell-aɣ
Yegguma ad aɣ-yeffeɣ usirem
Armi i d-aɣ-beddlen allaɣ
Win i d-yekkren ad tt-yesseεdel
Akken ad aɣ-yekkes nnhadi
I tekmamt yerna asadel
Syin ma d aɣ-yekkes awali
Ay asefru berka-aɣ
ma ulac ad nbeddel taqṣidt
Akked lehlak ajdid ad nennaɣ
Ma d lehlak aqdim teẓrid-t
Di taggara d izen i yebɣa ad d-yeṣṣiwed ɣef tsusmi n umaḍal i yeṭṭalayen di lejnas yettwaḥeqren, neɣ ɣef wazal n tlelli i neṣruḥ s utekki n kra n lejnas i iεemmden i waya. Yenna-d dɣa:
Nebɣa kan lejnas-iḍen
Wid yennumen tilelli
Xerṣum d cwiṭ ad t-jerben
D acu i takmamt ɣef yimi
Γas ur telli tissegnit ara idawin takmamt-nneɣ
Nessusem neḥḍer i twaɣit nettraǧu s anda teffeɣ
Ad tafem s wadda tavidyut n tezlit-a