Tafsut Taberkant d tin n tmanyin: kra seg yisaragen i d-yellan
Ilmend n usmekti n Tefsut Taberkant d Tefsut n Tmanyin, ddeqs n yisaragen i d-yettwaheyyan di temnaḍin yemgaraden n Tmurt Taqbaylit. Ad neɛreḍ ad d-nebder deg umagrad-a kra seg-sen.
Dɣa, gar-asen, yella usarag i d-yeḍran ass n 19 yebrir, di Ddruǧ n Baba Ɛli, i d-iheyya useqqamu n taddart Ḥumma Ubazin. Deg-s yella ladɣa Ǧamal Ixlufi i d-yewwin ɣef yiḥelliyen d yicqirrwen n umulli wis 41 n Tefsut n 80, akked Meqran Ɛeggun i iɛerḍen ad iserwes gar Tefsut n Tmanyin d Tnekkra n furar 2019.
Ass n 20 yebrir, deg yiḍ, iga Ɛaziz Tari, yiwen seg 24 n yimeḥbas n yebrir 1980, asarag deg Tifrit n Uqbu, taddart n Masin Uharun. Deg-s yemmeslay-d ɣef Tefsut-a n Tmanyin d wayen ibeddlen seg wass-n ar ass-a.
Racid Ulebsir, am tannumi, iga asarag deg At Mlikec, ass n 22 yebrir iεeddan, ideg i d-yewwi awal ɣef tgemmi tadelsant tarangawt (immatérielle).
Daɣen, ass n 23 yebrir, Kamira Nait Sid akked Mesṭafa Brahiti gan di taddart Agni, asarag s tnagiwin ɣef wayen yeḍran di Tefsutin n 1980, 1981 d 2001.
Sin seg yisaragen nniḍen nberreḥ-d yakan fell-asen deg uɣmis-nneɣ; ama d win n Ǧamal Laseb d Lhewwari Buxalfa di Ticci, neɣ d win n Ɛli Belḥut, iḍelli 24 yebrir, deg uxxam adelsan Reḥmani Sliman n Uweqqas.
Walit: