Ayt Smaεel: 12 n yiseggasen segmi tettwanɣa tjeǧǧigt n Sunya

Ass yecban iḍelli, 26 yebrir, i tettwanɣa deg Ayt Smaεel tuḥdiqt n Sunya Idir sɣur yiwen n umdan ur nessin leεqel d lmeεqul.

Tettwaqsef Sunya d tilemẓit n 15 n yiseggasen nettat ur tesεiḍ d acu texdem, ala lebɣi i tesεa i yiseɣ d tlelli di tudert.

Ass-nni n 26 yebrir 2009, ulac amezdaɣ n tɣiwant n Ayt Smaεel i izemren ad t-yettu. Ass-nni mi d-teffeɣ Sunya seg uɣerbaz-is alemmas di nniya-s, war ma teẓri dakken yiwen n umcum i as-yettilin itteddu ad as-isekfu ussan. Dɣa, amdan-a imcewwec, mi as-yessutur i Sunya kra n tɣawsiwin tugi-tent, iger ibeεεej-itt s tiyitiwin n tefrut (lmus) ur tuḥtam. Tettwaddem Sunya ɣer Sbiṭar n Xerraṭa, maca ur teṭṭif deg tnuffist-is; tgen i lebda. Teǧǧa yir amaḍal-a seld tiyita n leɣḍer, n uεuffu d tedderwect.

Ass-a mi εeddan 12 n yiseggasen seg twaɣit i tedder Ayt Smaεel, mazal Sunya deg wulawen. Mazal-itt d amedya n teḥdayin n temnaḍt-is ɣef wamek tella teẓwer di tɣuri, teḥdeq di tudert n yal ass, d mm yiseɣ deg ddunit-is, d tabeɣɣast berra uxxam, d Taqbaylit di tikli-s.

Akken dɣa ad tt-id-ttmektayen yimezdaɣ n Ayt Smaεel s udumu, yesbedd iseggasen-a yezrin Ugraw Tigawt Ilemẓiyen yiwet n teplakt n usmekti meqrub amkan anda tettwanɣa, d tajmilt i tmeṭṭut-a n umedya. Deg-s tedda-d tseddart seg usefru i yura Mhenni Xalifi, i tzemrem ad teɣrem merra-is deg wadda.

Gen di talwit a Sunya! Addud-im d amedya, d taqbaylit, d tamsirt.

Aḥezzeb n Sunya

Yesnaxfet Udrar yenzef

Deg wass i d-iḥettmen asmekti

Yesla i trelluct tettwaqsef

Yeɛreḍ ad yezzwer asḥissef

Ad yeṭṭef zun imeṭṭi

Maca mi yeẓra ur tessef

Tettwaccelqef d accelqef

Yeqqim iḥesseb nnhati.

A Rebbi a bu leɛnaya

Zuzzer rreḥma-k ɣef Sunya.

Teɣli-d tagut ɣef Ayt Smaɛel

Win itetten yebra i uḍebsi

Deg yebrir yebda ineɛɛel

Tafat-nni yellan tecɛel

S ufus n umcum ay texsi

Ay ibabaten sigget i saɣel

Sekret-d tarwa-nwen i ccɣel

Mebla tismin d lɣell

Mačči i uɛaned n usebsi.

Iwumi aɣenter d ssɛaya

Ma nesker-d yir dderya?

Fejɛen warrac nehhqen

Deg uɣerbaz n Zemmuri Ɛmer

D ayen ur dman ay d-ileḥqen

Truḥ-asen tin iḥedqen

Gar-asen tessuffeɣ leɛmer

Tura mi ulawen ceqqen

D almad n temsirt i ilaqen

Allaɣen ma yella ferqen

S uḥezzeb ara ten-nɛemmer.

Seg gar-aneɣ mi tsuq nniya

Tegla s tumɛint n Sunya.

Sliɣ tenniḍ i yimawlan-im

Ɣur-wat fell-i ur tettrum

Kem aql-ikem deg uxxam-im 

Testeɛfiḍ yezdig yisem-im

Win n ddunit ur idum

Tɛemmdeḍ ad yeddu yiẓiɣer-im

Ad tiliḍ d amedya i uɣarim

Wala ma yeḍra uhdum.

Ma ur tessinem leḥnana d leḥya

Sigget i wudem n Sunya.

Nettceyyiɛ-am-d “azul” a Tazwawt

Deg-s Rreḥma d usteɛref

Ɣas ma qerriḥ tilawt

Yelha ma nḍegger taɛdawt

Ad neẓẓu deg ul asuref

Ass-ayi nzemmel tihawt

Nesbedd asmekti ^deg tecwawt

Amezruy ad as-yecfu i tigawt

Yeɛwer wallaɣ ma yekref.

Adrar ɣef yisem-im yestenya

Steɛfu deg talwit a Sunya

Mhenni Xalifi 05/05/2014