Iberreḥ-d yes-s deg TQ5. Takfarinas: « i JSK ad cnuɣ baṭṭel deg wannar amaynut Meεtub Lwennas …»
Deg yiwet n temlilit i d-theyya di internet tiliẓri taqbaylit TQ5, d ideg kkin ddeqs n wudmawen, iberreḥ-d ucennay Aqbayli Takfarinas, ass n 12 mayu 2021, dakken atan iheyya ad yecnu baṭṭel deg tfuggla n usbedd n wannar Meεtub Lwennas amaynu di Tizi Uzzu. Meḥdub idrimen-nni, ara yawḍen ɣer 10 n yimelyaren, ad kecmen ɣer umiḍan n JSK.
Ad d-nesmekti belli di tedwilt-a, ideg yekki Ɛibud d kra n yirgazen n tedrimt, yessawel daɣen Takfarinas i wid d tid akk iḥemmlen JSK akken ad d-fken afus i terbaεt-a deg teswiεt-a ḥercawen i tettidir.
« Ad nsiwel akk i wigad iḥemmlen JSK, ad d-fken afus. Di ddunit-a drus i ileḥḥun war idrimen. Di yal taɣawsa laqen yidrimen. I win iḥemmlen JSK, ur k-nenna efk-aɣ-id amelyun, ur k-nenna ara efk-aɣ-id sin n yimelyunen, efk-aɣ-id εecra duru a Sid. Ɛecra dura, d 100 000 n yimdanen, ayen d 500 000€ […]. JSK-agi d ajerreb, ih! JSK ad yili yimal-is gar yifassen n tarwa-s ».
S yisem-is d anaẓur, yerna-d ihi Takfarinas tayet ɣer JSK akken ad tkemmel deg ubrid-a yelhan ideg tella lwaḥi d tenmehla tamirant d uselway Crif Mellal.
Wali daɣen: