Attɛeddi ɣef tlawin: teḍra-d tedyant nniḍen ass-a di Tbeskert

Seld tadyant n uttɛeddi ɣef 9 n tlawin tiselmadin i d-yellan di Burǧ Baǧi Muxṭar (Bordj Badji Mokhtar), ass n 18 mayu iɛeddan, yeḍra-d uttɛeddi nniḍen, ass-a 22 mayu, ɣef snat n tselmadin di tama n Tbeskert (Bsekra).

Tiselmadin-a ttwanecɛent tasebḥit-a, daɣen ttwawtent, deg tnezduɣt-nsent n uxeddim ideg ttnusunt. Ɣef wakken i d-ddan yisallen, ifares umdan bu yir nniya tagnit mi uɣalent tuget n tselmadin s ixxamen-nsent, di taggara n ddurt, akken ad yeẓdem ɣef snat i mazal ur wellant.

Taluft-a terna-d asḥissef d wurfan i wid akk yesseḥbibiren ɣef tlelliwin d yizerfan s umata, ladɣa imi simmal tettenṭerray tmeṭṭut taselmadt di tmetti tubsilt. Rnu-as tignatin ur nwenneɛ ideg qeddcent.

Ad d-nesmekti dakken ugar n 500 n tselmadin i yeǧǧan ussan-a axeddim-nsent deg uneẓruf imi ur ttḥulfunt s tɣellist (laman) seld tadyant n Burǧ Baǧi Muxṭar.