Awal n tallit: anta rreḥba d wanta tutlayt (sɣur Aẓar)

Si tikkelt ɣer tayeḍ, yettaf umaru tagnit d umḍiq anda ara yemlil imeɣriyen, ad asen-isenɛet ayen yura. Maca, anwa amaru? Anta tutlayt s ittaru?

Tikwal, ayen i yezmer ad isenz umaru deg temlilit n sin n wussan, ur t-yesnuzuy di tnedlist deg wayyur ahat. Acku llan yimeɣriyen, llan yimeɣriyen. Yella yimeɣri i yettnadin ɣef udlis s tayri n tɣuri, akken ad yelmed. Ama yessen ameskar n udlis neɣ uhu.

Yella yimeɣri i yettaɣen adlis m’ara yemlil d umaru, ama s tinna n tallelt, n usetḥi, neɣ n usbeyyen n yiman. Ulama taggayt-a taneggarut n yimeɣriyen i yettaɣen kan di rreḥba n udlis, yemgarad waddad-nsen ɣef leḥsab n umeskar i iwala. Ttilint-d tikkal ula d asetḥi-nni d zzux-nni ur ten-iseɛɛu akken ad iger ad d-yaɣ adlis. Ladɣa ma yella amaru-nni d win n teqbaylit; ur t-tcenneɛ ur t-tsemɣer tɣamsa. Uqan wid yettnadin ihi ad gen yid-s tawlaft akken ad tt-id-suffɣen di Facebook.

Aredmani, yenṭer udlis aqbayli ama di tnedlisin, ama di rreḥbat. Acimi ɛni? Acku tasekla i tqeyyem tmetti ar tura ugar d tin yuran s tefransist ɣas deg wakal aqbayli. Tidet kan, iwumi rreḥbat-a n udlis di Tmurt Taqbaylit ideg ttafen iman-nsen yidlisen n tefransist d teɛrabt?

Ala rreḥbat n udlis aqbayli kan i izemren ad d-awint kra i udlis aqbayli. Am rreḥba i d-itteddun n At Wasif, ara yilin seg 2 ar 5 di yulyu 2021. Neɣ, akken i d-iban, ahat ad tili ussan-a temzikkent nniḍen n udlis aqbayli/amaziɣ deg tesdawit n Bgayet.

Akken yebɣu yili, ilaq kan ad ṭṭuqqtent rreḥbat n udlis aqbayli 100% deg waṭas n tuddar. A d-nelhu d wayla tazwara, alama i d-iban ula d netta.

Aẓar