Alday n tlisa: Qqimen yiɣriben ttxemmimen ma ad d-ruḥen neɣ ad qqimen

Tεeyyen-d ussan-a Lezzayer s ulday n tlisa-s tigenwanin gar-as d kra n tmura, ara yebdun seg umenzu (1) n yunyu-a 2021.

Ulama yessefreḥ yisalli-a kra n yiɣriben i yettidiren di Fransa abeεda, maca yesserfa daɣen wiyeḍ ɣef snat n tsebbiwin. Yiwet tcudd ɣer teɣlayt n usikel (voyage), tayeḍ ɣer teqseḥ n tewtilin (conditions) i d-iḍefren aberreḥ-a.

Imi, yuɣ lḥal, send ad d-yeṭṭef abrid n tisin, ilaq ɣef uɣrib ad d-yeg aεraḍ PCR s wazal n 100 €. Syin, ad ixelles atiki n tmesrafagt ara yilin gar 500 d 800 €. M’ara d-yekcem di Lezzayer, ad yeqqim deg ukman deg walbaεḍ n yisensa azal n 5 n wussan. D netta ara ixellsen ayen s ara d-yekker yibeddi yid-s dinna, s wazal n 40 000 DA ahat, ɣef leḥsab n wacḥal n yidinaren i wass. Tin yernan ɣer-s, m’ara yekfu dayen ukman imḥettem n 5 n wussan, ad yuɣal ad yesεeddi i tikkelt nniḍen aεraḍ PCR.

Annect-a yakk iga-d aṭas n uttḥeyyer, tisewham d ufqaɛ ɣur yiɣriben, i yettxemmimen ma ad d-asen neɣ ad qqimen deg yinig. Si tama bɣan ad d-rzun ɣur twaculin-nsen seld lɣiba iḍulen, si tayeḍ ttwalin bezzaf ɣef texriṭ-nsen. Ulama llant liḥalat ideg ilaq ɣef uɣrib ad d-yekcem akken tebɣu tili ssuma ara ixelles.