(Tiwlafin). Axxam n Yiferḥunen am Tneṭṭaft Eiffel: yekker uhetwir ɣur Yiεerbawalen!

Ffɣent-d isragen-a (sswayeε) ineggura deg uẓeṭṭa inmetti n Facebook tewlafin n yiwen n uxxam deg Yiferḥunen i yettcabin di tsegda (architecture) ɣer Tneṭṭaft (Tour) Eiffel n Paris, di Fransa. Seg yimir-nni, kkren yiseqdacen n Facebook i uzuzzer n tewlafin-a d yisalli s ṭṭaqa armi d-kkant akk ddeεwa, uwwḍent ɣer Yiεerbawalen Izzayriyen.

Ma yella si tama n Yiqbayliyen, wennten-d yimdanen abeεda ɣef ccbaḥa n uxxam, tikti n tsegda akked wazal-is, ɣur Yiεerbawalen d ayen nniḍen i walan.

Ineggura-a, farsen ihi tagnit akken ad d-regmen deg Yiqbayliyen akken uɣen tannumi s temsirit (racisme) i d-sbeyyinen tal tikkelt. Dɣa, akken kan walan isalli deg yisebtar n tɣamsa taεrabt, serrḥen-d i wawalen n urgam am « Tarwa n Dugul ». Wiyeḍ nnan: « ad twehmeḍ acḥal i ḥemmlen Fransa » Neɣ « … ad mmten ɣef Fransa ». Wayeḍ iwennet-d « ɣef waya mazal ur teffiɣ Fransa si Tmurt-nneɣ ». Neɣ daɣen « D azuwwaf 100% », « εebbden-tt ttzuxxun yes-s ».

Aredmani, d aṭas n rryuy ireggmen i d-yekkan sɣur-sen.
Maca llan wid iwalan yecbeḥ uxxam-nni, rnu bab-is d ilelli ad as-yeg tasegda i yebɣa.