(Tavidyut). Yuɣal-d s uklip ussan-a: tiɣri n lxiq n Murad Gerbas s yisem n yal aɣrib

Isuffeɣ-d ussan-a iɛeddan ucennay Azwaw Murad Gerbas yiwen n uklip d amaynut s uzwel n « Ixaq wul ». Ayen i d-yuwwi deg-s s umata, d ayen icudden ɣer tallit-a iweεren n ukman i ttidiren yimdanen, tugart-tugart iɣriben.

Dɣa, iccekta-d s wudem n tezlit ɣef wayen i d-yessegra Covid-19 d lmeḥna, tamara d lxiq. Amzun akken d tiɣri n yal aɣrib i d-yessaweḍ netta s uẓawan d usefru.

Akken yeqqar di tsetna (refrain) n tezlit:

Ixaq wul yebɣa ad iruḥ
Ad iẓur wid iεzizen
Ay aytma iḍaq rruḥ
S tmara i nuɣal d iɣriben

Syin yekcem deg usirem d umenni n tirza ɣur lwaldin ukkud i d-tḥettem teswiεt lefraq. Yerna yebder-d tirza ɣef Tmurt Taqbaylit, s umedya n Bgayet, Tizi Wezzu d Tubiret.

Deg tseddart tis snat, imeslay-d ɣef ssenf nniḍen n beṭṭu, armi tenɣel lḥila n ssber: wa d win yerzan imdukkal d wid i iḥemmel wul.

Ma deg tseddart tis kraḍet, yebder taluft n tuεert n lefraq-a akked tansa-a. Yenna: « win i as-yennan yeshel lefraq, ad ijerreb akken ad iẓer ».

Si tama n uklip, yelha s umata wamek yemmug, d wamek yebḍa usinaryu-is. Yefren ucennay ad d-yesdukkel deg-s ula d iḍebbalen d tceṭṭaḥin.

Tzemrem si tura ad ttwalim aklip-a n terga-s Youtube deg wadda.