(Tiwlafin). Asunded di Tmurt: Aweqqas terra-d i tiɣri s ṭṭaqa

Seg tsebḥit n wass-a, amhad 10 yunyu, tuget n tḥuna d yimukan n ttjara medlen tiwwura-nsen di temdint n Uweqqas, i d-yezgan s wazal n 25 n yikilumitren ɣer usamar n waɣir n Bgayet.

Yuɣ lḥal, aṭas n yimeɣnasen isertanen i d-yessawlen i usunded-a (grève) si Tmurt Taqbaylit neɣ si berra. Ama d at tnekkra taɣerfant neɣ d amussu i ufraniman n Tmurt n Yiqbayliyen.

D acu kan, deg Uweqqas d waṭas n yimeḍqan nniḍen, mazal ad ikemmel usunded alama d kraḍ n wussan, ɣef wakken i d-ffɣen yisallen.

Ad d-nesmekti dakken yella-d usunded-a i ubeyyen n uɣunzu n tefranin i d-itteddun i yebɣa ad d-iheyyi udabu n Lezzayer seldazekka 12 yunyu 2021.
Rnu-as i usuter n tuffɣa n yakk imeḥbas isertanen d wid n rray.