Sidi Ḥaǧ Ḥasayen: tiɣri i tikci n yidlisen i temkarḍit d tamaynut

Ussan-a iεeddan i tesbedd tdukkla tinmettit “Tagmat” Sidi Ḥaǧ Ḥasayen, n taddart i yettawin yiwen n yisem, di tɣiwant n Ccmini, tamkarḍit n yidlisen i yimezdaɣ n temnaḍt-nni s umata.

Kra n wayyuren tura ɣer deffir segmi tekker tdukkla-a i usenfar-a akken deg-s ad tdegger iɣermanen, abeεda ilemẓiyen seg-sen, ɣer tɣuri n yidlisen. Deg-s ad tseqreb imeɣri n Sidi Ḥaǧ Ḥasayen ɣer umaru i yeṭṭafar neɣ i yebɣa ad iɣer.

Akka tura mazal tetteddu tiɣri i yimaruyen d yimsiẓergen ma nwan ad d-fken azuḥ n yidlisen i usnerni n temkarḍit-a tamaynut. Gar wid yebɣan ad kkin, yella Racid Ulebsir i d-yuran ɣef waya ula deg umiḍan-is n Facebook.

D ayen ibanen dakken aṭas n wayen yelhan ara d-tawi temkarḍit-a i medden n tɣiwant n Ccmini merra, d taddart Sidi Ḥaǧ Ḥasayen tugart-tugart.

Win yebɣan ad yekki s tikci n kra n yidlisen, yezmer si tura ad isiwel i wuṭṭun n tilifun s i d-tberreḥ tdukkla-a Tagmat: 0662257510.