Tifranin n 12 yunyu: liḥala ar tura di Tmurt Taqbaylit

Armi d 13:00 n wass-a, 12 yunyu, iban-d ur tefki Tmurt Taqbaylit azal i tefranin-a tisaḍufanin akken yella yetturaǧu.

Akken i d-ffɣen kra n yisallen d tvidyutin, tuget n yibiruyen n lvuṭ medlen tiwwura-nsen, wiyeḍ ɣas ini ur rzan medden ɣer ɣur-sen.

Deg Uweqqas, Aqbu d waṭas n tɣiwanin nniḍen, cerrgen yimdanen tinazalin (affiches) n lvuṭ, rnan senfalin-d aɣunzu-nsen. Nesḥassef imi yella wanida i d-yella ula d kra n ccwal. Amedya di Leqser, agezdu n Bgayet, yeḍra-d kra n ccwal iḍ iɛeddan imi imezdaɣ n temnaḍt-nni ɛewwlen i uẓdam ɣef yibiruyen n lvuṭ i d-yettwaheyyan.

Di Tizi Wezzu daɣen, tuget n yibiruyen ur ldin ara maḍi seg wakken ur bɣin yimezaɣ ad buṭin. Ɣas ulama di temdint gedged, llan yimeḍqan yeldin d yiɣermanen yettbuṭin. Armi dɣa d 11:00, yuwweḍ ufmiḍi (pourcentage) n tikkin deg Tizi Wezzu ɣer 0.24 %.

D yiwen n waddad ula di Tubiret, am Lesnam d Yimceddalen anda ssawalen yilemẓiyen i uɣunzu n tefranin-a. Yettili-d akka tura ula d kra n ccwal imi ur bɣin yimezdaɣ mi ttwaldin yibiruyen ɣur-sen. Deg At Leqser, medlen akka tura yiberdan, rnu yella-d kra n umbaraz gar lɣaci d yiɣallen n tɣellist.

Armi d asrag-a (tasaɛet) ihi, nezmer ad d-nini ur d-terri Tmurt Taqbaylit i tiɣri n ubuṭi-a. Ma ikemmel wanya akka, ad yili meẓẓi maḍi-maḍi ufmiḍi n tikkin.