Ḥeḍru-d ad d-tennulfu taggazt n tezrawin Lwennas Meεtub

Tberreḥ-d ussan-a Malika Meεtub, uletma-s n uɣewwaɣ Lwennas Meεtub, dakken yezmer lḥal ad d-tesnulfu tesbeddit-nsen taggazt n tezrawin (bourse d’études) Lwennas Meεtub.

Tefka-d awal-a ass n 19 yunyu iεeddan deg temkarḍit taɣiwant n Tmezrit, imi tella d tinebgit n Ugraw n yilemẓiyen d tɣiwant-a i d-nebder i tiwin n yiwen n usarag ɣef umecwar n Meɛtub Lwennas.

« Nekni di Tesbeddit Lwennas Meεtub, nberreḥ-d ilmend n umulli wis 21 n tmenɣiwt n Lwennas, nenna-as ad nwali kan ansi i nezmer d-nawi tadrimt akken ad d-nesbedd taggazt n tezrawin Lwennas Meεtub», i d-tenna Malika Meεtub.

Tuɣal tenna-d: « Taggazt-a ad tt-nefk i yisdawanen ara ixedmen ama ɣef wayen i d-yeǧǧa Lwennas, ama ɣef wayen yettwali ɣef tmaziɣt, neɣ tagrawla n Lezzayer,imi netta yella d anagi n tallit-is, d anagi n umezruy n Lezzayer d Tmurt Taqbaylit ».

Ad d-nesmekti dakken ddeqs n yiqeddicen i d-yennulfan taggara-a d tajmilt i Lwennas Meεtub, am umsizwer n ccna d usaru fell-as i yetturaǧun ad d-yeffeɣ.