Kraḍ n yiseggasen segmi i aɣ-teǧǧa: awal ɣef tmarut Kaysa Xalifi

D yelli-s n Udrar n Fad, tlul Kaysa Xalifi ass n 14 di yunyu 1991, di taddart n At Tεisiwt taɣiwant n At Smaεel, di Bgayet.

Γas ulamma tiyita i as-tefka ddunit ur d tin isehlen, imi tehlek aṭṭan yegdel fell-as tikli. Meεna werǧin i as-tekna Tukyist i teqseḥ n waṭṭan-a. D anemgal, Kaysa tqubel-it s tebɣest.

I yisalli, Kaysa teḥbes amecwar n tɣuri-s deg uswir wis semmus n uɣerbaz amenzu. Meεna lebɣi-s i tmussni ur yeḥbis ara, d ayen i tt-yeǧǧan dɣa tkemmel amecwar-is n tɣuri i yiman-is. Ula d gma-s Mhenni akked twacult-is fkan-as afus n tallelt deg waya.

Seld kra n yiseggasen segmi i d-teḥbes taɣuri, telmed yelli-s n Udrar n Fad tutlayt-is taqbaylit i ur teɣri deg uɣerbaz. Syin akkin tebda tettaru kra n yiḍrisen s yes-s.

Yuɣ lḥal Kaysa tella seg wid iḥemmlen tamedyezt d wawal iweznen. Segmi i tella d tamecṭuḥt, nettat tesmuzgut i yinaẓuren iqbayliyen, am Dda Lwennas Meεtub, Lunis Ait Mengellat, Crif Ḥamani d wiyaḍ.

Ayagi dɣa, yessekcem-itt deg umaḍal n tmedyezt, tuɣal ula d nettat tesmedyiz.

Ad d-nesmekti belli Kaysa tella d tamarut, d tamedyazt, d taneɣmast, d tameɣnast n yizerfan n tmeṭṭut, akked yidles amaziɣ s umata. Am akken i teqdec daɣen deg uṣenfar n usideg n kra n yidigan iliktruniken ɣer tutlayt taqbaylit.

Γas ma yella temmut nettat mazal-itt meẓẓi, deg 27 n yiseggasen kan teṣṣaweḍ tura kraḍ n yidlisen : ungal ” Iḥulfan “, ammud n tmedyezt ” Kemm deg-i “, akked win n tullisin ” Tabṛat “.

Ass-a 25 di yunyu 2021, Kraḍ n yiseggasen segmi i tensa teftilt-is. Ccil tɣab tfekka-s, leqdic-is, tegzi-s, tayri-s i teqbaylit-is, mazal-iten ad ddren i lebda. Acku ayen i d-teǧǧa Tukyist ur yettmettat ara.

Steεfu deg wadeg-im n lebda a tuḥrict n At Smaεel.