(Tiwlafin). Tasdawit n Bgayet: ar melmi ad ikemmel usaru n tuggdi?

Snat n tedyanin i d-yeḍran di kra n wakud kan di tesdawit Ɛebderreḥman Mira di Bgayet. Tamezwarut d attuεeddi ɣef yiwet n teqcict, di tesdawit n Targa Uzemmur. Taneggarut-a iẓedmeḍ fell-as yiwen n umuḥuc, yettuεedda ɣef nnif-is, acku tugi ad as-tefk tagnit i uqeṣṣer.

Ma yella d tis snat, d amennuɣ ageεmir i d-yeḍran iḍelli di tnezduɣt tasdawant Amizur, gar isdawanen-nneɣ akked wid n tmura tiberraniyin.

I yisalli, amennuɣ-a yegla-d s ddeqs n yimejraḥ, imi nnuɣen s leslaḥ amellal.

Asteqsi ara d-yerzun ɣer wallaɣ, acu i tamentilt ( sebba) n waya ? anida-ten imasayen( responsables ) ɣef tɣellist (sécurité).

Zik tasdawit, neɣ tanezduɣt tasdawant, d idigan anda i d-yessalay usdawan aswir-is. D amkan anda i d-yettagem tamussni, ama d tin n leqraya, ama d tin n ddunit.

Imir-n mara yili yiwen d asdawan, ttqadaren-t akk medden, ttεuzun-t, imi ttraǧun deg-s ad d-yawi abaɣur i tmurt-is akked twacult-is ɣer sdat.

Ula d tasdawit, neɣ d tanezduɣt tasdawant, ttcedhin medden ad kecmen ɣer ɣur-sent. Acku, ala wid yesεan aswir εlayen i yettdewwiren dinna.

Neɣ s unamek-nniḍen, d axxam n unelmad wis sin. Kullec yella deg-s, ladɣa taɣellist.

Ass-a d anemgal, win umu ara tiniḍ tasdawit, ad yexẓu adeg-nni.