(Tiwlafin). Iga unaẓur Nazim Si lekḥel timzikkent d timgerrezt lexmis-a iɛeddan deg Tizi Uzzu

Yella unaẓur-awellaf Nazim Si Lekḥel di ttiεad, sendiḍelli 15 yulyu, akked yiwet n temzikkent tameqqrant i d-iheyya ilmend n wass aɣelnaw n ugrud, deg tzeqqa n tẓuri n uxxam n yidles Mulud At Mɛemmer. Aqeddic-a d asenfar i yettuɣalen ɣer waṭas n wayyuren ɣer deffir. Imi, ugar n tewlafin n yigerdan i iga netta s timmad-is, yella yenced Nazim imedyazen akken ad as-d-gen tadeddart n usefru i tal tawlaft, ɣef wakken i asen-d-usan yiḥulfan.

Yuɣ lḥal, seg yimedyazen-a i yekkin, llan Yizwawen, Icawiyen, Imẓaben, Imaẓiɣen n Merruk d Yirufanen. Di temzikkent-a, ulama d tallit n Covid-19, aṭas n yinerzafen i d-yerzan, gar yimḥemmalen n tẓuri, imdukkal n unaẓur d yimedyazen. Ula d Nabila Gumezyan, tanemhalt n yidles n Tzi Uzzu, teḥḍer ddeqs n tegnatin n usihar-a.

Nesteqsa dɣa anaẓur i terza taluft ɣef yiḥulfan-is, yenwa ad yesnemmer tazwara kra n wid i d-yeddan ɣer yidis-is: « Tanemmirt tameqqrant i Massa Goumeziane Nabila akked wid iqeddcen yid-s di Tenmehla d uxxam n yidles Lmulud At Mɛemmer Tizi Wezzu. Daɣen, tanemmirt tameqqrant i tiddukla tadelsant Adrar n fad n At Smaɛil qeccuc-meccuc i yi-d-yefkan afus n tallelt i leqdic-inu, ladɣa Mass Aselway n tiddukla Hakim Kerrache, i yi-d-yefkan afus n lemɛawna nezzeh.

Ad snemmreɣ daɣen Mass aselway n taɣiwant n At Smaɛil Mass Sadek Rebai i yellan yid-i dima deg useddu n leqdic-iw. Tanemmirt n ddheb i yimedyazen i d-yegren afus di leqdic-agi amxalef, abeɛda wid i d-yerzan Iḍelli ɣer tullya tunṣibt n tefsert-a : Mousa Salmi, Lkheyyer Brahimi, Ammar Zinet, Arib Massinissa, Khettabi Ahmed, Ziane Rezki, Babou Mohand, Louni Salah, Kaddour Rabah, Aghougali Younes, Katia Touat, Louni Hocine akked unaẓur n teklut Ahmed Bilek. Ad rnuɣ ad snemmreɣ s waṭas Mass Allaoua Rabehi i yi-ɛawnen di tsuqilt n tseddarin yuran s tefrensist ɣer teqbaylit. Ad farseɣ tagnit akken ad as-srebḥeɣ alluy-ines ɣer tizi n uprufisur. Mebla ma ttuɣ Mass Mezine Ali, Aselway n umazday n taddart Igerzafen akked uselway terbaɛt n waddal Vovinam viet-vo-dao Souk El Tenine tizi wezzu Mass Kadouche Samir ».

Deg wayen i aɣ-d-yenna daɣen Nazim Si Lekḥel, yecreh s tidet s ttiɛad-a, ɣas yemmug di tegnatin iweɛren n Covid-19. Tennerna tumert-is imi caḍen wid yefkan azal i uqeddic-is. Yessaram amer ad d-yeglu usenfar-a s kra n ubaɣur i warrac, skud i ddemma-nsen i d-yennulfa.

Walit deg wadda kra n tewlafin seg usihar-a igerrzen n Nazim Si Lekḥel i d-yellan ihi sendiḍelli.