At Ɛebbas: sin n yilemẓiyen i yenɣan iman-nsen deg yiwet n ddurt

Gar tmettant-nsen, kra n wussan kan, amezwaru d Yusef Xuǧa Raḥim, seg taddart n Ḥendis, taɣiwant n At Rzin.

Aneggaru-a iga tiliset i tudert-is, ass n imensawen n lεid, neɣ ass n arim ( lundi ) yezrin.

Isalli-a yesseɣli-d leḥzen d ageεmir ɣef temnaḍt n At Ɛebbas s umata, imi yettwassen d aqcic ireẓnen, iḥemmlen ddunit. Γef leḥsab n tnagiwin n yimdukkal-is, yella yettaḍsa kan, werǧin yesεa ugur ula d yiwen.

Ayen yessuhamen ugar, d akken mazal ur ttun tawaɣit tamezwarut, terna-d tis snat. D ilemẓi-nniḍen i yenɣan iman-is iḍelli, deg yiwet n tɣiwant, deg At Rẓin. Wagi d Cerdwan Ɛellawa, seg taddart n Genzet, taɣiwant n At Rzin. Ula d netta dɣa, akken i d-nnan fell-as At taddart-is, d aqcic lεali, ixḍa i wayen n diri.

Nessḥassef nezzeh ɣef wayen iḍerrun di tmetti-nneɣ, ur d axeddim, ur d imal ( avenir ) yelhan, armi i sruḥen yilemẓiyen asirem.

Deg lawan anda ilaq ad farṣen tudert-nsen, wa yezger lebḥer, wayeḍ yefren abrid n rrwaḥ war tuɣalin, neɣ s unamek-wayeḍ, yefren amaḍal-nniḍen.

Ad d-yazen Rebbi ssber i twaculin-nsen, d talwit i tnuffisin-nsen nutni.