Seld tirẓi n Ɣilizan, terfed-d JSK ixef-is mgal MCA

Tessaweḍ terbaεt n Yilemẓiyen Inaddalen n Teqbaylit (JSK), iḍelli tameddit, ad ternu tarbaεt n Lmuludiya n Lezzayer s sin n yiswan ɣer yiwen (2-1). Tella-d temlilit-a deg unnar n umenzu n wamber n Tizi Uzzu ilmend n wass wis 34 n telɣuɣa.

Segmi xesren ddurt iεeddan deg Ɣilizan, ssawḍen yimdukkal n Ḥemrun ad seɣlin tarbaεt n Lmuludiya, ad d-rren taflest i yiman-nsen. Ɣas ulama d Lmuludiya i yeldin agemmuḍ d tamezwarut, tḥella-d terbaεt taqbaylit amεadal, s ubrid n Ḥemrun, send ad ifakk uḥric amezwaru n temlilit.

Mi d-kecmen i uḥric wis sin, kkren yimesdurar i tikti n tiwin n yiswi wis sin imi ẓran d acu i azal n tneqqiḍin n temllilit-nni. Mačči d ayen isehlen imi tuget n yimuraren n Lmuludiya nnejmaεen di temḥaddit. Ɣas akken, skemmlen yizmawen n Ǧerǧer yiwet n tigawt timezdit i d-yerra Ḥemrun i tikkelt nniḍen d iswi s tiyita n uqerru.

Tura akka, tarbaεt n Yilemẓiyen Inaddalen n Teqbaylit aql-itt deg umḍiq wis 7 s 52 n yiεeqqayen. Ihi asirem n keffu deg kraḍ imenza mazal yella.