Lmut n Raḥima d yelli-s: yeḥkem ccreε dakken mačči s lebɣi i tent-yenɣa urgaz-nni

Deg ucareε i d-yellan ass n 27 yulyu yezrin, ɣef tedyant n tmenɣiwt n Massa Raḥima akked yelli-s, i yettwanɣan ass n 9 di meɣres yezrin, sɣur gma-s n Raḥima, yeḥkem unezraf ( juge ) dakken timenɣiwt-a ur telli s lebɣi.

Γef leḥsab n wayen i d-nnan yiεeggalen n umussu asdukklan ( mouvement associatif ) n uhudd ɣef tedyant n tid iruḥen d asfel, anezraf-a yeḥkem belli tiyitiwin i ttwawtent tneggura-a, d ujraḥ i jerḥent, ur yelli yiswi-nsent tigawt( action ) n tmenɣiwt.

Rnu i waya, leḥkem-agi yeffeɣ-d war ma yesla i tnaga n yinagan.

I yisalli, argaz-agi i tent-yenɣan, iwekked-d di tnaga-s belli d netta i tent-yenɣan. Seg tama-nniḍen, yenna-d belli asmi i tent-yenɣa yella s tezmert n wallaɣ-is.

Yuɣ lḥal ula d ayetma-s , d baba-s ḥedren imi iga tadyant-a.

Ad d-nesmekti dakken deg uṣaduf n ccraε, win yewwten wayeḍ, ijjreḥ-it, yenɣa-t mebla aεemmad, ad ḥekmen fell-as seg 10 armi d 20 iseggasen.

D ayagi dɣa, i ur qbilen s yes-s ama d argaz n Raḥima d warraw-is, ama d amussu asdukklan n uḥudd ɣef tedyant-is.

Daymi i d-εewwlen ad xedmen anejmuε sdat n wexxam n teɣdemt ( justice ), i wakken ad d-inin ala i leḥkem-agi.

Γef leḥsab-nsen, argaz-a i tent-yenɣan d wid yellan ḥedren dinna, ilaq ad ttuḥasben ɣef wayen xedmen akken ilaq. Neɣ s unamek-nniḍen, ilaq ad yili leḥkem s teɣdemt ɣef wid yellan d tamentilt n tmenɣiwt n tneglust ( ange ) n 5 iseggasen, d yemma-s.