Tamurt Taqbaylit: werǧin tga-d tmes ixessaren am wid n tikkelt-a

Seg sendiḍelli, 9 ɣuct, zzin-d yijajiḥen n tmes i waṭas n tuddar n Tmurt Taqbaylit, rnan kecmen s ixxamen.
Di Tizi Wezzu weḥd-s, ayendin d tiɣiwanin i yettwaḥuzan, yettwasreɣ umur d ameqqran si tẓegwa-nsent.
Teqseḥ n tmes-a teǧǧa ad taweḍ ula d ixxamen di tudrin, armi rewlen yimezdaɣ si tuddar-nsen ad nadin tadarit deg temnaḍin iselken. Yuɣ lḥal, am tal tikkelt, dukken di ccedda-a s ulday n tewwura i kra n wid i yeǧǧan ixxamen-nsen.
Tagnit tewɛer ayendin imi ula d imattanen ttwajerrden ar tura ugar n 60. Ma d imejraḥ, ɣas ad d-nini d imeyyaten.
Sɛeddayen yimezdaɣ n temnaḍin-a yir tallit s ḥamu n tegnaw, win n tmes, rrwaḥ n trisiti d uẓeṭṭa, rnu-as kuruna.

Di Bgayet d Tubiret, ulama tendeh tmes sendiḍelli di kra n temnaḍin, maca iḍelli i d-tesban tuccar-is ugar.
Ɣef wamek i d-yuwwi Uḥuddu aɣarim n Bgayet, ugar n 67 n yiqlaɛen n tmes i d-yellan di 48 n tsaɛtin.

Ad d-nesmekti dakken ar tura mazal llan yijajiḥen urɛad nsan di lawan ideg kra sensen-ten yimezdaɣ d yirgazen n Uḥuddu aɣarim, kra yensa meḥsub weḥd-s mi isebleɛ ayen yellan deg ubrid-is.
Si tama n tallelt si berra neɣ si tmura, ar tura ḥaca Aza Azeggaɣ i yesqelɛen tabezzart i ubaɣur n wid yenṭerren. Lmir n Marseille di Fransa, yenna-d zemren ad ɛiwnen ma tsuter-asen-d Lezzayer.

Yuwwi-d ad d-nerr awellih ɣef wawal n yiwen n yimdebber deg Uḥraz n tẓegwa n Tizi Wezzu i d-yennan tettwasender tmes-nni s uɛemmed mačči s wudem agaman.
Ayen i d-yeḍran, d lmeḥna i Tmurt Taqbaylit, d tawaɣit i twennaḍt d tkulujit s umata.