D tamezwarut deg umezruy: snat n tlawin tiqbayliyin d tiεeggalin di tejmeεt n taddart

Seg tallit taqburt, tameṭṭut taqbaylit d tin yefkan azal i yiman-is s yiman-is. Ayagi imi, turar nnuba di tmetti ur temgarad ara ɣef tin n wergaz.

Ass-a taneggarut-a terna twekked-d belli amkan-is di tmetti yesεa azal nezzeh. Neɣ s unamek-nniḍen, llsas n tmetti yebna fell-as akked wergaz lwaḥid.

Seg yimedyaten n tlawin i iqeddcen deg wannar, ad d-nebder snat n tmeɣnasin i yerẓan azaglu, kecment d tiεeggalin i tejmaεt n taddart n Uẓru Uqellal, taɣiwant n Micli.

Taluft terza Massa Nasira Hadduc, d tamastant di Tizi Wezzu, akked Kahina Qasi Wali, d taselmadt n tmaziɣt di tsedawit n Tizi Wezzu. Ḥedrent dɣa ula i unejmuε i d-yellan deg taddart-a, ɣef demma n wid yerɣan seg tmes i iḥuzan Tamurt Taqbaylit.

I yisalli, taddart n Uẓru Uqellal, tella seg tid yenḍerren nezzeh seg yijajiḥen n tmes. Mmuten deg-s kuẓ n yemdanen, d ddeqs n wid ijerḥen.

Di taggara, ad as-nerr tajmilt i tmeṭṭut taqbaylit, acku d nettat i tigejdit n wexxam.

Di lawan anda ur ksibent ara tlawin di tmettiyin-nniḍen azref ula i wawal, tameṭṭut taqbaylit tḥudd ɣef tlelli n tmurt, tetekka di myal aṣenfar.