( Tiwlafin ).asmuzzeɣ n twennaḍt: Yerna yemḍebber n ” AKBOU MALL” tira taqbaylit i teplakin.

Deg tigawt igerrzen nezzeh, yerna yemḍebber n unammas anezzan ( Centre commercial) n ” AKBOU MALL ” tira taqbaylit i teplakin-is n udellel. Ayagi dɣa yeṣṣefreḥ ddeqs n yemdanen, imi ula d tutlayt tamaziɣt tuklal ad tesεu amkan-is di tmurt-is.

I yisalli, tira s teqbaylit deg iseggasen yezrin tebda tettban-d. Yuɣ lḥal, llant temnaḍin i yebdan yakan deg usmuzzeɣ n twennaḍt-nsent.

Amedya n temnaḍin-a, d taɣiwant n At Smaεel i yuran ddeqs teplakin s teqbaylit, s usebɣes n uselway n tɣiwant-a Mass Sadeq Rebaεi.

Di taggara, yewwi-d ad nesnemmer imḍebber n ” AKBOU MALL ” ɣef ccɣel-a yelhan nezzeh. Seg tama-nniḍen, nessaram ad ḍefren wiyad abrid-is, ad as-fken i tutlayt-nneɣ amur-is.