Talɣuɣa: JSK tga amɛadal akked terbaɛt taneggarut deg usismel, JSMS

Ilmend n uleqqem n wass wis 30 n telɣuɣa, turar tameddit n wass-a terbaεt n Yilemẓiyen Inaddalen n Teqbaylit (JSK) akked terbaεt n Skikda (JSMS) deg wannar n tneggarut-a. Agmuḍ n temlilit aneggaru d yiwen ɣer yiwen.

Deg uḥric amenzu, kecmen-d Yizmawen n Ǧerǧer s lebɣi d ameqqran akken ad rnun. D ayen i ten-yeǧǧan ad d-awin iswi amezwaru di temrect tis 15 s ubrid n umurar Hewwar. Yuɣ lḥal, yuwwi-d iswi ula di temlilit iεeddan mgal Paradu.

Seld iswi-a, εerḍen yixsimen ad d-uɣalen s ujerreḍ n kra n tigawin iweεren. Maca ur sawḍen ad d-rren timenṭagin-nsen d iswi. Armi dayen, iseffer unefray taggara n uḥric-a s uɣlab n terbaεt taqbaylit yiwen n yiswi ɣer wulac.

Deg uḥric wis, nezmer ad d-nini am wakken uɣalen yimuraren n JSK ɣer deffir deg wurar. Daymi i d-uwwin wat uxxam iswi, semsawan-d agmuḍ. Dɣa, d agmuḍ n yiwen n yiswi i tal tarbaɛt (1-1) i swayes tekfa temlilit-a.

I uselɣu, ad yeǧǧ waya JSK ad tesεu 61 n tneqqiḍin, ad teṭṭef amḍiq wis semmus (5) deg usismel (classement) amatu n telɣuɣa i yekfan.