Xerraṭa: ttwaṭṭfen 25 n yiɣermanen sɣur yiɣallen n laman

D leḥriṣ ageεmir i d-yellan ɣef temdint n Xerraṭa ussan yezrin sɣur yiɣallen n laman.
Ayagi imi, uɣalen yiɣermanen ( citoyens ) ɣer tikliwin-nsen, anda i ssuturen aserreḥ n yimeḥbas i yettwaḥebsen di lbaṭṭel.

I yisalli, yella-d ula d kra ccwal di temnaḍt-a gar kra n yemdanen akked yiɣellan n laman, acku gedlen fell-asen ineggura-a ad kemmlen tikliwin-nsen.

Yuɣ lḥal, ttwaṭṭfen ass n letnayen 6 cutember yezrin 25 n yiɣermanen seg temnaḍt-a.
Imi ɣef leḥsab n yiɣallen n laman, ttabaεen ɣer Umussu n Ufran-iman (MAK), i sersen yakan d tuddsa tarebrabt ( organisation terroriste ).

Rnu i waya, ɣef leḥsab-nsen, ufan deg yexxamen-nsen iselsa n lεesker, tiɣawsiwin tuzzigin n MAK, akked leslaḥ amellal.

Seg tama-nniḍen, ttwaṭṭfen sin n yiɣermanen-nniḍen deg At Wartilan, tawilayt n Ṣtif. Ula d nutni daɣen, ttwasersen seg terbeεt yettabaεen i Umussu n MAK.

Ddeqs i d-yeffɣen mgal n tuṭṭfiwin-a, ula d Tamɣunt Tazzayrit i Uḥuddu ɣef yizerfan n wemdan ( Ligue algérienne pour la défense des droits de l’homme (LADDH) ) tessuter ad d-ssuffɣen ugar n 20 i yettwaṭṭfen.