Bgayet: yetturaju ad d-telḥeq tfekka n Anǧuḥ Masina azekka

Masina Anǧuḥ, d yiwen n yilemẓi i yesεan 26 n yiseggasen. Mmi-s n Tdergunt, taɣiwant n Yiderginen, tawilayt n Bgayet, ufan-t ddurt yezrin di texxamt-is yemmut, di tmurt n Kanada.

Ad d-nesmekti belli, Masina yerza ɣer tmurt n Kanada, i wakken ad ikemmel taɣuri-s dinna. Tura azal n sin n yiseggasen-aya.

Isalli n tmettant-is yesseɣli-d leḥzen ɣef twilayt n Bgayet, d wid i t-iḥemmlen s-umata. Imi yettwassen s teḥdeq-is, d tterbiyya-s igerrzen.

Γef leḥsab n yisallen i aɣ-d-yewwḍen, d aṭṭan n uxenẓir n yidammen i d tamentilt n tmettant-is.

Ihi, seld ddurt n uraju, yetturaju ad d-telḥeq tfekka-s, azekka 17 tuber tameddit n wass.

Ma yella d timṭelt-is, ad tili i wass n arim ( lundi ) 18 tuber 2021 di tmeqbert n Yiɣil Iḥemducen, taɣiwant n Iderginen.

Ad d-yazen Yellu tabɣest i twacult-is