” Aṭas ” : d azwel n uḍebsi amaynut n ugraw ” amzik “

Γef leḥsab n wayen i d-berrḥen deg usebter-nsen facebook, 28 wembir i d-iteddun, d ass ideg ara iwali uḍebṣi-nsen amaynut, umu fkan azwel ” aṭas ” tafat.

I wakken ad ssisnen leqdic-nsen i wid i ten-iḥemmlen, i wid yettraǧun amaynut-nsen. Sεan timlilit yid-sen ass n tuffɣa n ulbum ɣef 14: 00 n wass, di ” Cabaret Sauvage “, di tmurt n Fransa.

War ccek, d amaynut ara d-yawin buhan umaynut, imi yettwassen ugraw-nsen s leqdic-is igerrzen.

Ahat ayen yefkan i uxeddim-nsen ccbaḥa, d assaɣ yelhan yellan gar-asen.

Ad d-nesmekti belli, agraw-nsen deg-s kraḍ n yilemẓiyen, sin deg-sen d akniwen, Abdennur akked Karim Belqadi ( Belkadi ). Ma yella d wis kraḍ, d amdakkel-nsen, Xereddin Kati.

Ineggura-a, s tẓuri n wawal, d tẓuri n uxeddim, ṣṣawḍen deg kra n wakud, kecmen ɣer wulawen n ddeqs n wid iḥemmlen taẓuri.

Akken i t-id-yessbeyyin yisem n ugraw-nsen, ilemẓiyen-a di ccna-nsen ṭṭfen deg tjaddit seg yiwet n tama. Meεna rennun-as kra n umaynut s tama-nniḍen. D ayen i yefkan dɣa i leqdicat-nsen taɣawsa tuzzigt.

Yuɣ lḥal, deg kra n tezlatin n yinaẓuren-nneɣ i εewden, ttaken-asent ccama tamaynut s tmussni-nsen.

Di taggara, nessaram-asen afud igerrzen, d ddeqs n usmurres ɣer sdat.