Internet: Acimi yebɣa ugraw Facebook ad ibeddel isem?

Yettheyyi Ugraw Facebook ad ibeddel isem gar-aɣ d kra n wakud kan. D ayen i d-yuwwi uɣmis uzzig The Verge ussan-a iεeddan.

Yuɣ lḥal, ad naf deg Ugraw-a ameqqran Facebook, aẓeṭṭa inmetti Facebook, Instagram, Watts App akked Oculus. Ɣef wakken i d-tuwwi teɣbalut i d-nebder, yebɣa Ugraw-a ad ibeddel isem war ma iḥuza isem n uẓeṭṭa-is inmetti mucaεen. Meḥsub, Facebook ad yeqqim yisem-is akken.

Ma yella d ssebba n ubeddel n yisem i Ugraw s umata, yettusemma i termist (entreprise), tcudd ɣer yiwen n usenfar d amaynu i ira ad d-yeslal yimḍebber n Ugraw-a Mark Zuckerberg. Ad ilint deg usenfar-a termiyin tuhlisin (virtuelles) timaynutin ara yesxedmen tilawt tuhlist d tilawt yennernan.

Seg usenfar ara d-yasen, akken i d-tberreḥ yakan tkebbanit-a, zemren ad d-nnulfun azal n 10 000 n yimeḍqan n uqeddic di Turuft (Europe).

Gar-aɣ d kra n wussan ihi, ad d-binent ugar tlufa ɣef wamek i yebɣa Facebook ad ibeddel isem neɣ ad d-yawi amaynut nniḍen di tetiknulujit.