Tamenɣiwt n tmeṭṭut di Tizi Wezzu: ayen i neẓra ar tura

Yeḍra-d iḍelli tameddit, amhad 28 tuber, yiwen n wanɣa (crime) ucmit mi yenɣa yiwen n urgaz tameṭṭut-is, mu ssawalen Dehbiyya Crifi, s tiyitiwin n lmus deg umkan mu qqaren “La Tour”, di temdint tamaynut n di Tizi Wezzu.

Ssebba tunsibt n tmenɣiwt-a taweḥcit ur tban ara, maca ɣef wakken i d-ffɣen kra n yisallen, d mi tsuter tmeṭṭut-a berru sɣur urgaz-is i iεedda ɣer tigawt-nni tamenɣayt. Ɣef leḥsab n kra n tnagiwin nniḍen, mi yexdem ccɣel am win, iεedda urgaz-nni ɣer Ubrid uzrib (Autoroute) n At Ɛisi anda yenɣa iman-is s usehwu (accident).

Yuwwi-d ad d-nini dakken deg yiẓeḍwan inmettiyen, ṭṭfen taqacuct usḥissef d wurrif ɣef waddad ideg i d-teggra tmeṭṭut di tmetti n wass-a i iɣerqen di tal tasnakta.

S wakka, yeḍḥa-d yettimɣur irennu umḍan n tlawin i yettruḥun d tiseflatin n yirgazen. Imi, i usmekti, ass n 7 tuber iεeddan i yenɣa daɣen yiwen n urgaz taxḍibt-is di Mirabu.