D lawan n welqaḍ n uzemmur: kra n yiwellihen i wakken ad awen-d-yeffeɣ zzit igerrez

Zzit n uzemmur, d zzit yesεan abaɣur meqqren i tezmert n wemdan. Lameεna, ma yella yelqeḍ-it-id yiwen uqbel lawan-is, neɣ mara iεeddi lawan-is, yuttuɣal-d s lemḍerra ɣef tezmert.

Rnu i waya, ula d amek i d-yettwalqeḍ, neɣ i d-yettwacrew, neɣ i d-yettwazwi, yetturar nnuba tageεmirt deg ṣṣenf n zzit ara awen-d-yefk.

Deg umagrad-a, ad neεreḍ ad awen-d-nmudd kra n yiwellihen ilaqen, i aɣ-d-mlan wid yessnen, i wakken ad awen-d-yeffeɣ zzit-nwen d win yeṣfan, d win ara awen-d-yawin abaɣur i tezmert-nwen.

Seg tama-nniḍen, win yettḥadaren tazemmurt-is, yettdawi-tt, iferres-itt, yettletha yid-s, ula d nettat ad as-terr lxir-is s lɣella yelhan.

• Melmi i d lawan iwulmen i uwelqaḍ n uzemmur?

S udem amatu, alqaḍ n uzemmur yettili-d deg tegrest ( cettwa), meεna ɣef leḥsab n yimussnawen, igerrez nezzeh ma yella-d gar tazwara n wembir, armi d taggara d dujember. Ayagi acku, imir-n i yettili uzemmur yesεa ini d ajenjar (violet), imir-n dɣa i d-yettak zzit yelhan, ɣas ma yella tettenqas cwit lɣella-s.

• Ini n uεeqqa uzemmur, d ubaɣur-is

Aεeqqa n uzemmur azegzaw : mazal ur yeggi ara, imir-n yeččur d wayen umu qqaren ( les antioxydants ). D ayen i t-yettaǧǧan ineḥḥer deg yiles.

Aεeqqa uzemmur ajenjar ( violet ) : d win i yelhan i tezmert, ɣef leḥsab n wid yessnen. Ama seg tama n rriḥa, neɣ n lbenna.

Aεeqqa uzemmur aberkan: imir-n i as-neqqar yegga. Γas ma yella imir-n tettili lɣella lεali, meεna ṣṣenf n zzit-nni cwiyya-t.

Aεeqqa uzemmur aberkan nezzeh, imir-n yetteɣlay-d ɣer lqaεa. Γef leḥsab n yimussnawen, ur ilaq ad t-yeǧǧ yiwen armi d lawan-nni, imi yettuɣal zzit diri-t.

• Amek i ilaq ad d-yekkes yiwen azemmur-is

Γef leḥsab n yimussnawen, acraw n uzemmur seg tzemmurt srid i lbican akk axir.

Ma yella d azway s uεekkaz, ijerreḥ iεeqqayen n uzemmur.

• Anda ilaq ad ires uzemmur uqbel ad yettwaεṣer ?

Yelha ma yesres-it yiwen deg tkajutin n uplastik yeflan, i wakken ad yessnuffes. Rnu i waya, ur ilaq ad iεeṭṭel nezzeh, mulac ad yexṣer.