(Tavidyut). Amaynut n Tariq Ait Mengellat: awal ɣef ubruy n tezlit “tutlayin” n walbum ara d-yeffɣen ussan-a

Γef leḥsab n wayen i d-iberreḥ deg usebter-is n Facebook, ad d-yeffeɣ uḍebsi-ines amaynut ass n 19 wamber i d-iteddun. Ihi, d ttiεad i ttεassan s ccuq wid i t-yettabaεen i t-iḥemmlen. Abeεda, imi acḥal-aya nutni ttraǧun-t umaynut-a.

Ad d-nesmekti belli, album-a amaynu, d win umu yefka azwel ” tutlayin “. Seg tama-tayeḍ, ama d aẓawan, neɣ d awalen d netta i ten-ixedmen.

Ma nemmeslay-d ɣef ubruy n tezlit ” tutlayin “, nezmer ad d-nini belli d tizlit s wazal-is. Ayagi imi, teččur d lemεani seg yiwet n tama, rnu tettmeslay-d ɣef tidet ideg yettidir uzwaw s umata seg tama tayeḍ.

Γef waddad n temslayt-nneɣ, tariq yesmekti-aɣ-d belli ur nesεi tameslayt yeṣfan. Acku neṣṣexlaḍ-d timeslayin-nniḍen.
Ugur-nneɣ ameqqran, imi neǧǧa tameslayt n lejdud, nefka azal i tmeslayin tiberraniyin
Γef usentel-a yenna-d:

Mkul wa( yiwen) s tmeslayt-is
Ma d nukni xerben-aɣ lehḍur
Win iwumi icudd yimi-is
Lmenṭeq yuɣal d ugur
Neǧǧa ayen i aɣ-d-ǧǧan lejdud
I tmeslayt anda i d-tegri
Ma nεemmed i tiyita n rrεuḍ
Tafat-is ad aɣ-d-tessawki

Am akken i aɣ-d-yehder ɣef wamek i ttaken wiyaḍ azal i wayla-nsen, ttzuxxun s yes-s. Akken dɣa, i d-yewwi ad nili ula d nukni.
Dɣa yenna-d :

Asmi i ẓureɣ irumiyen
S trumit i yi-d-hedren
Ufan-tt-id asmi i d-lulen
Di lakul yis-s i qqaren
Ur yelli anwa ad asen-yinin ameslay-nwen diri-t
Ur yelli anwa ad asen-yinin ad tthedrem taberranit
Ula d nekkini ad hedreɣ tameslayt n lejdud-iw
Ula d nekkini ad ɣreɣ, ad ɣreɣ tameslayt-iw

Γef tudert n mmi-s n unaẓur Lunis Ait Mengellat, tariq yella d win iqeddcen nezzeh deg wannar n yidles. Imi ur yelli d acennay kan, lameεna d anaẓur, d amaru daɣen.

Rnu i tezlatin-is i yettaru d uẓawan i asent-yettak, Tariq segmi i yella d amecṭuḥ netta iḥemmel tira. Dɣa, deg umecwar-is n tira, ar tura yessuffeɣ-d ungal s tutlayt n trumit umu yefka azwel “Le petit prodige”.

War ma nettu, Tariq d win iqeddcen daɣen, ama deg uḥric n tesenselkimt tudlift ( infographie ), neɣ deg usuffeɣ n yisura imecṭaḥ 3D ( réalisateur).

Nessaram-as afud igerrzen, d usmurres idumen.