Acimi i wexxṛen yimsidren ɣef tiɣin n uyaẓid?

Sdat n ssuma n uksum n uyaẓid i yulin nezzeh ayyuren yezrin, dɣa yeggeḍ armi d 500 n Yidinaren deg kra n temnaḍin. Yufa-d uɣerman Azzayru iman-is ur yezmir ad d-yaɣ ayaẓid i as-d-yettqamen ugar n 1200 n Yidinaren i yiwen.

Ad d-nesmekti belli, ɣas ma yella tuder-d cwiṭ ssuma-s ussan-a, dɣa tettruḥu seg 350 armi 380 n Yidinaren, meεna d lmuḥal ad zemmren medden ad t-id-aɣen. Ayagi imi, tizemmar-nsen n tiɣin ( leur pouvoir d’achat ) ur ten-teǧǧi ara.

Γef leḥsab n wid i ten-yettrebbin, ur yelli wugur deg-sen, acku ula d nutni seg tama-nsen ttaɣen-d icillawen ( les poussins ) s ssuma ɣlayen. Γef waya dɣa, yenna-aɣ-d yiwen deg-sen : ” ddurt yezrin tewweḍ ssuma n yiwen ucillaw i 200 n yidinaren, war ma nettu tuččit akked udawi-nsen. Rnu i waya, leεtab-nneɣ deg urebbi-nsen. Ihi ma yella tmuqqel-d ɣer wayagi akk, ad d-naf iman-nneɣ nexṣer “.

S ugzul n wawal, imsidren ( les consommateurs ) Izzayriyen, simmal yettader weswir n tmeddurt-nsen. Imi seg yiwet n tama, tuli ssumma n kullec, ama d igumma neɣ d tidal. Seg tama-nniḍen, amur ameqqran deg-sen ur xeddmen ara. Ma d wid ixeddmen deg-sen, ttaɣen tamayyurt rxiṣen.