Idles : ttiεad amezwaru n rreḥba n wedlis di tɣiwant n Tirmitin

Tidukkla tadelsant ” Itran n usirem ” n tɣiwant n Tirmitin, s ddaw leεnaya n tenmehla n yidles d tẓuri, d useqqamu aɣerfan n Tizi Wezzu, heggan-d rreḥba tamezwarut n udlis. Ayagi, i wakken ad ssidren idles, ad fken afus n tallelt i yimyura-nneɣ, i wakken daɣen ad ssbeɣsen taɣuri.

Taneggarut-a, ad d-tili seg uzekka 18 armi d 23 dujember 2021 di tesnawit n Ḥusin At Ḥmed.

I yisalli, Tirmitin d tin i yeggugen azal n 12 n Yikilumitren ɣef twilayt n Tizi Wezzu, d wazal n 7 n Yikilumitren ɣef Draε Benxedda.

Γef leḥsab n umaru Ḥsen Merric, ugar n 100 n yimyura akked 10 n yimaẓragen ara yilin di ttiεad. Ihi, d tagnit tidettit i temlilit gar yimeɣriyen d yimyura seg yiwet n tama. Seg tama-nniḍen, d tagnit-nniḍen i wid yeffuden tamussni, d wid yettnadin fell-as i wakken ad d-zedmen seg teẓgi n tmussni n umaru-nsen i iḥemmlen.

Ad d-nesmekti belli tigawt-a, d ayen igerrzen nezzeh, ladɣa imi xuṣṣent mliḥ timliliyin am tigi. Rnu i waya, amaru s udem amatu yettaf iεewwiqen meqqren i wakken ad yezzenz idlisen-is. Daymi i yeḥwaǧ i timliliyin am tigi, i wakken ad yessissen aqeddic-is.

Di taggara, d tinnubga i kra n win iḥemmlen tira, akken ad yerzu ɣer rreḥba-a. Nessaram-asen afud igerrzen.