Bgayet : acimi i d-yeḍḥa webrid n tmacint i yellan gar Bgayet d Lezzayer d amihi

4 n wussan kan segmi i d-yeḍra usehwu (accident ) iweεεren nezzeh gar tmacint i yettawin seg Bgayet i Lezzayer tamanaɣt, akked ukamyun ameqqran JMC n uεebbi n sselεa. Aneggaru-a, yeḍra deg wadeg umu qqaren Mellala, di Wed Γir, deg ubrid n tuɣalin n tmacint i Bgayet.

I yisalli, ɣas ur llin wid yemmuten, lameεna yejreḥ deg-s unehhar n ukamyun i yesεan anagar 22 n yiseggasen.

Ad d-nesmekti belli, ur yelli d tikkelt tamezwarut i teḍra tadyant am tagi deg ubrid-a. Imi, ddeqs n terwiḥin i iruḥen d asfel mmutent deg-s.

Asteqsi ara d-yerzun ɣer wallaɣ n yal yiwen deg-neɣ, acimi i mazal ḍerrunt-d twaɣiyin deg ubrid-a.

Deg usentel-a dɣa, mgaradent tmuɣliwin seg wemdan ɣar wayeḍ, nukni neεreḍ ad d-nejmeε timentilin n yisehwa-a, ɣef leḥsab n tnagiwin n kra n yemdanen.

Yuɣ lḥal, llan wid yettwalin belli abrid-a d aqbur nezzeh, ula d uzzal-is iṣeddeḍ yerka, ahat d ayen i d sebba n wayen i d-iḍerrun deg-s. Ihi, yewwi-d ɣef yimasayen ( responsables ) ad t-qeεεden.

Ma yella d ulbeεḍ-nniḍen ttwalin belli d amdan i d sebba n waya, imi yettḍegger deg ubrid n tmacint iblaḍen d yisɣaren, i d-ixellqen uguren i tmacint-a.

Seg tama-tayeḍ, llan wid yettwalin belli abrid-a n tmacint ixuṣ nezzeh deg yiεessasen, s unamek-nniḍen, ulac taɣellist deg-s imi ulac wid yettεassan deg myal aneḥbus ( arrêt ) n tmacint-a.

Di taggara, nezmer ad d-nini belli caḍent tmentilin n yisehwa, lameεna tifrat tella tella.