At Buɣerdan: tεedda akken iwata tfaska n ubernuṣ di teṣrigt-is tis snat

Tejmeεt n taddart n At Deḥman, s ufus n tallelt n Useqqamu aɣerfan n twilayt n Tizi Wezzu, akked tɣiwant n Assi Yusef di Buɣni, heggant-d taẓrigt tis snat n tfeska n ubernuṣ. Taneggarut-a, tella-d deg teɣzi n 3 n wussan, seg 20 armi d 22 yennayer 2022.

I yisalli, taẓrigt n useggas-a, d tajmilt i yiwen n tgejdit n ccna aqbayli, Helli Ɛli, i ilulen di temnaḍt-agi, i yettwassnen s tazlit-is mucuεen ” yeǧǧa-yi-d baba abernuṣ “.

Mass Helli Ali, yeǧǧa-aɣ deg useggas n 2017, ass-a dɣa rran-as tajmilt i yuklal.

Ad d-nesmekti belli, ddeqs n leqdicat i d-yellan deg tfaska-a, ama d timsiknin ( expositions). Anda i d-fesren yimeεraḍ axeddim-nsen, ama d tiqendyar n Leqbayel, lfeṭṭa, tiẓiḍanin, tiɣawsiwin n ufexxar, neɣ d ayen-nniḍen. Lameεna, gar wayagi akk, d abernuṣ i yeṭṭfen amḍiq ageεmir, dɣa ddeqs n leṣnaf i d-yettwafesren dinna.

Seg tama-nniḍen, ass n amhad fkan-as ttiεad ula i yisaragen ɣef umezruy-nneɣ. Ilmend n waya, Mass Helli Amar, akked Helli Husin, wwin-d asarag s wezwel ” Chachnaq, le pharaon Amazigh “. D asarag s wazal-is anda i ḥeḍren ddeqs n wid i d-yerzan.

Ma yella d ass aneggaru, yella-d deg-s ufraq n warrazen, akked tifki n yigerdasen i wid ittekkan deg tfaska-a.

Di taggara, d lwajeb fell-aɣ ad nesnemmer wigad ibedden ɣef ccɣel-a armi yessmurres. Imi, iswi-nsen iεedda skkin i yisem n tfaska, d iswi azedgan i ran ad xedmen, d abernuṣ-nneɣ i bɣan ad ḥerzen. Yuɣ lḥal, abernuṣ ur yelli d aselsu kan, abernuṣ d amezruy, d nnif, d laṣel, ilaq ad t-neḥrez, ababat ad t-id-yettaǧǧa i mmi-s.

Γef ubernuṣ yenna-as Mass Helli Ɛli fell-as talwit:

Yeǧǧa-yi-d jeddi abernuṣ
Abernuṣ i as-d-yeǧǧa baba-s
Yenna-d ḥader-it ɣef wammus
Ma yumes teɣli lqima-s
Fell-as ur ttak afus
Neɣ areṭṭal n yiwen n wass