Mraw n yiseggasen segmi aɣ-yeǧǧa: awal n usmekti ɣef Crif Xeddam

Ilul-d unaẓur Crif Xeddam deg wayyur n Yennayer 2877 (Aseggas imaziɣen) i d-yuzgan d 1927 MTSƐ, deg Taddart N At Bumesɛud (Imsuḥal). Yeǧǧa-yaɣ ass n 12 di Yennayer 2962 (Aseggas imaziɣen) i d-yuzgan d ass n 23 Janvier 2012 MTSƐ.

Imawlan-is d imrabḍen, yernu aɣerbaz-is yella yebɛed ɣef wexxam-nsen. Ihi yuzen-it baba-s ɣer temɛemmert (tareḥmanit) n At Bujlil. Maca ur iɛeṭṭel ara deg-s imi yeṭṭef abrid ɣer Lezzayer tamaneɣt ad inadi ɣef uxeddim. Syin yunag ar Fransa deg 1947 am netta am yilemẓiyen di tallit-nni.

Di Paris, yezga ixeddem di lluzin maca yeqqar daɣen azawan, solfej d ccna. Isbedd tarbaɛt n ccna deg 1954. Mi d-yewwi iman-is, yejmeɛ iṣurdiyen, yessuffeɣ-d aḍebsi-ines amezwaru (seg ljib-is) deg 1955 “yelli-s n tmurt-iw leɛnaya n temɛict-iw”. Dindin tekcem taɣect n ucennay-a deg wulawen n Leqbayel. Anfaras Pathé Marconi isla yes-s. Yules-as asuffeɣ n uḍebsi amezwaru yerna wiyaḍ am “yelli-s lfamiliya” akked “ini-d ma tḥemmleḍ-iyi”.

Icna Crif Xeddam ɣef tmurt d tudert n yal ass n Iqbayliyen, ɣef lɣeṛba d tayri, amedya Nadya, ǧeṛǧiṛa, lemri, a leḥbab, ɛacen, zzman, Bgayet telha. Mi d-yuɣal si Fransa ikcem ɣer wexxam n rradyu anda yexdem nnig 20 n yiseggasen. Tella ɣur-s nnuba yettwassnen aṭas, “iɣennayen uzekka” ansi d-ffɣen aṭas n yicennayen n teqbaylit am Lunis At Mengellat i d-yecnan zdat-s “ma truḍ” deg useggas 1967.

Yerna yessufeɣ-d tizlatin nniḍen am “lukan i d-tettuɣal temẓi” akked “tenna-yi yemma” anda ittcekkir tilawin. Yura daɣen i Nwaṛa, yecna yid-s tizlatin am “nemfaraq ur nxemmem” akked “ula d nekk yewɛeṛ ad ttuɣ”.

Crif Xeddam si gar yimezwura i d-iskecmen lɛud (Asɣaṛ) d upyanu ɣer ccna n teqbaylit, lameɛna bnadem m’ara isell i tezlatin-is ittḥulfu s rruḥ n teqbaylit tedder deg-sent. Tsuffeɣ-d Taseɛdit Yasin adlis s tefransist ma tebɣam ad teɣrem ɣef tmeddurt-is : Cherif Kheddam ou l’amour de l’art, “Crif Xeddam neɣ tayri n tẓuṛi” ɣer tizrigin La Decouverte/Awal, Paris deg 1995.

Gar tizlatin-is timeqqṛanin ugar n tiyed, tella yiwet i ugaren, d Bgayet telha, swacu yerra tajmilt i Bgayet.

Taɣbalut: wikipédia