At Rẓin: Tafaska n umager n tefsut di teẓrigt-is tis snat

Amager n tefsut neɣ amenzu n tefsut, d ansay agejdan i d-ǧǧan lejdud-nneɣ, nukni neḍfer ljerra-nsen.

Ilmend n waya, myal aseggas theggin-as yimezdaɣ di tuddar n temnaḍt n leqbayel, ladɣa tilawin akken iwulem i wass-nni. Dɣa, ttmagaren-t s ccbaḥa i yemtawan d tin n tefsut, d thuski i yecban tin n yijeǧǧigen.

Γas ulamma mgaraden wansayen seg temnaḍt ɣer tayeḍ. Imi llan wid i t-ixeddmen s seksu s udergis, llan wiyaḍ s ameqful. Di temnaḍt n At Ɛebbas, teffɣent tlawin d warrac ɣer tezgi, ččarayent tixecwalln-nsen s tẓiḍanin d myal lxir.

Amedya ɣef leqdicat i d-yettilin deg umenzu n tefsut di temnaḍt n At Ɛebbas, d leqdic i d-thegga tdukkla tinmetti-tadelsant Lefnar. Yuɣ lḥal, berrḥen-d ɣef tfaska n umenzu n tefsut, di teẓrigt-is tis snat.Taneggarut-a, ad d-tili ass n sem 4 meɣres i d-iteddun di taddart n Ḥendis, taɣiwant n At Rẓin, ɣef 10: 00 .

I yisalli, sswejden-d ɣef demma n waya, ahil d amerkanti n wayen icudden i wensayen-nneɣ. Ama d icewwiqen n tlawin, urar n lexlat, ahil i warrac imecṭaḥ, iḍebbalen n At Ɛebbas, neɣ d timziknin ( expositions ). Ma yella d imekli, akken i yuɣen tanummi yimezdaɣ n At Ɛebbas s umata, xeddmen-d ameqful.

Tigurra n taddart ldint i wid yebɣan ad ḥedren i tfaska-a, ihi ili-ken di ttiεad.

Ad d-nesmekti belli, yelha ma terzam ɣer dinna s iselsa-nneɣ, am tqendurt n leqbayel. Imi ccbaḥa n yiniten-is, ad ternu ɣef ccbaḥa n tefsut.