Timenɣiwt n tlawin: tettwanɣa yiwet n tlemẓit n Bgayet di Tmurt n Franṣa

Dehbiya, d yiwet n tlemẓit i yesεan anagar 28 n yiseggasen di leεmer-is. Taneggarut-a ufan-tt temmut deg uxxam-is di Tmurt n Fransa.

I yisalli, Dehbiya d yelli-s n Genduz, taɣiwant n At Rẓin, tawilayt n Bgayet. Seld imi tezwej, yewwi-tt wergaz-is ɣer Tmurt n Fransa anda i tella tettidir.

Γef leḥsab n yisallen i aɣ-d-yewwḍen, Dehbiya ur temmut s tin n Rebbi, lameεna, yella win i tt-yenɣan. Ayagi imi, ufan di tfekka-s ccwami ttcabahent tid n win yettwaxenqen.

Ar tura mazal ur d-tban tidet, ama d aniwa i tt-yenɣan, neɣ ma yella d tidet tettwanɣa neɣ ala.

Yuɣ lḥal, imawlan-is d wid i tt-iḥemmlen di taddart-is, teṭṭef-iten rrehba d leḥzen ageεmir. Ladɣa imi, tilemẓit-a tella d tunecriḥt nezzeh, d tin iḥemmlen tudert.

Di taggara, neṣṣawaḍ aεezzi-nneɣ i twacult-is, fell-as talwit n bab igenwan.